Saul ima snonkaku Roma mboi iba ro Tarsus. Ima snon Farisi ḇefawi nanem Sasoser Yahudi, ma imewer kaku faro snonkaku Kristen sya. Syun ḇe rum sena ma iyer si ḇe ḇondi ma isun si ro bui. Fyor snonkaku sso Stefanus kuker karui, isya kako ro dia.

Ḇape Saul fyor snonkaku Kristen ḇero Yerusalem sya monda ḇa. Mboi dor ḇe imam ḇeba insama iwani ḇe kota Damaskus fa fyor snonkaku Kristen ḇero diwansya kako. Ḇape fafisu imbe fyanam kota ani, fyoroḇa sananai oso isnaiyar i, mura isapi. Ryower mkaren oso ḇekofen, ’Saul, rosai ḇefnai fa ḇewayam ayani?’ Saul ifuken, ’Manseisau?’ Mkaren ani ikofen, ’Ayaiso Yesus. Rwamura ḇe Damaskus, ma nari wafawi rosai wafrur kaku ya.’ Fafisu anya Saul myam ḇa, inja ḇeso i sya sikfin i fa syun ḇe kota ani.

Ro Damaskus, snon Kristen ḇesouser oso ḇenir ḇe Ananias isya. Yesus dawos ḇe i ro fasasnai oso ḇo ikofen, ’Rwaḇe Yudas rum ḇyedi ro Nyan Ḇeyaḇyoḇer, ma swewar snon oso ḇenir ḇe Saul.’ Ananias doḇe, ’Tuan e, yarower sfawar nabor kwar kuker snon ine! Syun manfamyan besya ro bui!’ Ḇape Yesus ikofen ḇe i, ’Rwamura wasrow i. Snar yakinfir Saul i kwar fa ḇyaryas ankankinem ḇeḇye ḇe er syakam.’

Inja, Ananias isrow ḇeri Saul i ma ikofen, ’Saul naek yedi, Yesus iwan aya ḇe dine insa mam wer.’ Rodia Saul myam wer. Ramnai, fyarkor Yesus nyan ḇyena ma dakḇe manfamyan ḇe i. Fyor ḇyebaptis ramnai, Saul ḇyaryas ankankinem ḇeḇye ine ro rum ari kuker manfamyan ḇesesya.  Kwarapan rariso snonkaku Yahudi sya sikandor kaku fyor smam Saul byuk farkarkor kuker Yesus i? Sikofen ḇo soḇe, ’Snon ine iso randak ya fyor Yesus manfamyan ḇyesya bo?’

Saul ḇyaryas ankankinem ḇeḇye taun rikyor ro Damaskus. Imboi snonkaku Yahudi sine simewer kaku i. Sisewar nyan fa smuni. Ḇape, bati ḇyesya sifawi aw ani, inja sisewar nyan fa syaye ro kota ani. Sikyui i kuker inawen ḇeḇa oso ro mkir ḇero tembok kota ani.

Fyor Saul ryaḇe Yerusalem, iryur kuker snonkaku Kristen ḇero diwansya. Ḇape, simkak i. Inja, manfamyan oso ḇenir ḇe Barnabas dun Saul i ḇe manfamyan ḇesesya. Dawos user ḇe si snar Saul imbror kwar. Ro dia ḇyaryas ankankinem ḇeḇye kuker raryaḇ fnoḇek sidang jemaat ro Yerusalem. Ḇarpur ido, sifawi i ḇe Paulus.