Si Saulo usa ka Romano nga natawo sa Tarso. Pariseo siya nga eksperto sa Balaod sa mga Hudiyo, ug gidumtan niya ang mga Kristohanon. Gipadakop niya ang Kristohanong mga lalaki ug babaye ug gipapriso sila. Nagtan-aw pa gani siya dihang gibato sa suko kaayong mga tawo si Esteban hangtod mamatay.

Pero dili lang ang mga Kristohanon sa Jerusalem ang gustong ipadakop ni Saulo. Nananghid siya sa hataas nga saserdote nga moadto siya sa siyudad sa Damasco aron ipadakop sab ang mga Kristohanon didto. Sa hapit nang moabot sa siyudad si Saulo, kalit lang nga naay misidlak nga kahayag, ug natumba siya. Nakadungog siyag tingog nga miingon: ‘Saulo, nganong ginalutos ko nimo?’ Nangutana si Saulo: ‘Kinsa ka?’ Ang tingog mitubag: ‘Ako si Jesus. Adto sa Damasco, ug didto mahibaloan nimo kon unsay imong himoon.’ Dihadiha, nabuta si Saulo, ug kinahanglan siyang ihatod sa siyudad.

Sa Damasco, dihay matinumanong Kristohanon nga si Ananias. Giingnan siya ni Jesus diha sa usa ka panan-awon: ‘Adto sa balay ni Judas sa dalan nga gitawag ug Tul-id, ug pangitaa si Saulo didto.’ Si Ananias miingon: ‘Ginoo, kaila ko anang tawhana! Iyang gipapriso ang imong mga tinun-an!’ Pero miingon si Jesus: ‘Adtoa siya. Akong gipili si Saulo nga mosangyaw sa maayong balita ngadto sa daghang nasod.’

Busa giadto ni Ananias si Saulo ug giingnan: ‘Saulo, igsoon ko, gisugo ko ni Jesus nga ayohon ka.’ Dihadiha, makakita na si Saulo. Gitudloan siya bahin kang Jesus ug nahimo siyang tinun-an. Human bawtismohi si Saulo ingong Kristohanon, misangyaw siya sa mga sinagoga kauban ang ubang mga Kristohanon. Seguradong  nakurat ang mga Hudiyo pagkakita nila kang Saulo nga nagtudlo sa mga tawo bahin kang Jesus. Miingon sila: ‘Dili ba mao ning tawhana ang nagpapriso sa mga tinun-an ni Jesus?’

Tulo ka tuig nga nagsangyaw si Saulo sa mga tawo sa Damasco. Naglagot ang mga Hudiyo kang Saulo ug nagplano sila nga patyon siya. Pero nahibaloan sa mga tinun-an ang maong plano busa ilang gitabangan siya nga makaikyas. Ilang gibutang siya sa dakong basket, gihiktan kini, ug gipaubos agi sa bangag sa pader sa siyudad.

Pag-adto ni Saulo sa Jerusalem, makig-uban unta siya sa mga tinun-an didto. Pero nahadlok sila niya. Dayon naay buotang tinun-an nga ginganlag Bernabe nga nagdala kang Saulo ngadto sa mga apostoles aron sultihan sila nga dili na daotang tawo si Saulo. Human niana, makugihon nga nagsangyaw si Saulo bahin sa maayong balita uban sa kongregasyon sa Jerusalem. Sa ulahi, siya nailhan nga si Pablo.