Saul akamana ke Tarsus. Enye ekedi Jew onyụn̄ edi eyenisọn̄ Rome. Enye ekedi Pharisee, ama enen̄ede ọdiọn̄ọ ibet mme Jew onyụn̄ asua mme Christian etieti. Enye ama esisan̄a osion̄o mme Christian, iren ye iban, ke ufọk ọkọdọn̄ ke ufọk-n̄kpọkọbi. Enye ama ada ese nte mbon ntịme ẹtọn̄ọde mbet Jesus emi ekekerede Stephen ke itiat ẹwot.

Saul ama oyom n̄ko ndika n̄komụm mme Christian ke mme obio eken ndidọn̄ ke ufọk-n̄kpọkọbi nte enye akanamde ke Jerusalem. Enye ama ọdọhọ akwa oku ọnọ imọ odudu ika Damascus ikomụm mmọ. Nte enye osụk akade ke usụn̄, un̄wana ama ayama akanade enye okụk inikiet inikiet, enye ama ọduọ ke isọn̄ onyụn̄ okop uyo owo ọdọhọde ete: ‘Saul, ntak emi afo ọkọbọde mi-e?’ Saul ama ọdọhọ: ‘Afo edi anie?’ Owo oro ama ọdọhọ ete: ‘Ndi Jesus. Ka Damascus, ke ẹyedọhọ fi se edinamde.’ Ẹtetịn̄ mi, Saul ama oforo nnan, ẹkemomụm enye ubọk ẹdụk obio oro.

Mbet Jesus kiet ama odu ke Damascus, emi ekekerede Ananias. Jesus ama ọdọhọ enye ke n̄kukụt ete: ‘Ka ufọk Judas ke efak emi ekerede Nnennen kọdọhọ ke iyom Saul.’ Ananias ama ọdọhọ ete: ‘Ọbọn̄, mmọdiọn̄ọ ete oro! Enye esisan̄a omụm mbet fo ọdọn̄ ke ufọk-n̄kpọkọbi!’ Edi Jesus ama ọdọhọ ete: ‘Ka bịne enye. Mmemek Saul nte ọkọkwọrọ eti mbụk ke ediwak idụt.’

Ananias ama okokụt Saul onyụn̄ ọdọhọ ete: ‘Saul, eyenete mi, Jesus ọdọhọ nditat fi enyịn.’ Kpa idahaoro, Saul ama afiak ọtọn̄ọ ndikụt n̄kpọ. Ẹma ẹkpep enye n̄kpọ ẹban̄a Jesus; enye ama akabade  mbet, ana baptism onyụn̄ ọtọn̄ọ nditiene mme Christian n̄kwọrọ ikọ ke nsio nsio synagogue. Eketie mme Jew didie ini mmọ ẹkụtde Saul asan̄ade ekpep mme owo n̄kpọ aban̄a Jesus? Mmọ ẹma ẹdọhọ ẹte: ‘N̄kọ ete emi ekesisan̄a omụm mbet Jesus ọkọdọn̄ ke ufọk-n̄kpọkọbi?’

Saul ama ọkwọrọ ikọ ofụri isua ita ọnọ mme owo ke Damascus. Mme Jew ẹma ẹnen̄ede ẹsua enye ẹnyụn̄ ẹduak ndiwot enye. Edi mbet eken ẹma ẹkop, ẹnyụn̄ ẹsịn enye ke akpasa ẹsụhọde ke ibibene ke edem obio.

Ke Saul ama ekesịm Jerusalem, enye ama odomo ndidian idem ye nditọete do, edi mmọ ẹkefefehe enye. Mbet kiet emi ekekerede Barnabas ama an̄wam enye etieti. Enye akada Saul ebịne mme apostle akanam mmọ ẹnịm ke enye ama okpụhọde. Saul ama ọtọn̄ọ ndisan̄a ye esop ke Jerusalem nsịn idem n̄kwọrọ ikọ. Ekem ẹma ẹtọn̄ọ ndisikot enye Paul.