Eejachi wanee wayuu kanüliakai Saulo, roomajeʼewai nia otta joʼuushi nia chaa Tarso. Nia wanee fariseo atüjashi maʼin süpüleerua tü pütchi aluwataanakalü anain na judíokana. Nüʼürülashii na nikirajüinkana Jesuu, nüpüreesajawalin naya otta najaraijawalin nepialuʼujee, tooloyuu sümaa jieyuu. Wanaa sümaa niʼinaʼannüin Esteban süka ipa, yalajachi Saulo sünain anajaa sukua tia.

Nnojoishii nüpüreesajireein neʼe Saulo na nikirajüinkana Jesuu chajanaka Jerusalén, nüchajaweein nachiki napüshuaʼa. Müsüjeseʼe nuchuntuin Saulo nümüin chi laülaashikai napüleerua na sacerdootekana süpüla nuluwataain nia chaa Damascomüin süpüla nütaʼülüin na nikirajüinkana Jesuu. Shiasaʼa nülüʼülaapa Saulo Damascomüin, süchuwajaaka wanee luusa sirumaluʼujee. Nuʼnnajaaka mmoluʼumüin sutuma. Naapaka joo Saulo wanee anüikii sünain maa: «Saulo, ¿jamüsü müliaka maʼin taaʼin putuma?». «¿Jarai pia?», nümaka Saulo. Susoutünaka nümüin: «Taya tayakai Jesuu. Puʼuna Damascomüin, jee yala aküjüneerü pümüin tü anakat süpüla paaʼinrüin». Moʼupaʼaleesai Saulo soʼu kaʼikat tia jee najattünaka süpüla nüntüin Damascomüin.

Eejachi wanee wayuu kanoulashi maʼin kanüliakai Ananías chaa Damasco. «Puʼuna nipialuʼumüin Judas, suluʼumüin tü kaaye kanüliakat Lotusü. Jee yala, pünteechi anain Saulo», müshi Jesuu nümüin Ananías. «Senyotkalee, chi wayuukai, taapüin nüchiki sutuma wayuu wainma sünain wattain saalin kasa mojusü naaʼinrakat namüin na anoujashiikana sümaa nüpüreesajirüin naya», nümaka joo Ananías. «Puʼuna maa nümaʼanamüin süka taneekajalain chia wayuukai süpüla naashajaainjachin süchiki tü kasa anasü naaʼinrajatkat Maleiwa sümüin wayuu wattapünaa», nümakalaka Jesuu nümüin.

Nuʼunaka joo Ananías eejachire Saulo. «Saulo, tawalachee, nuluwataala taya Jesuu süpüla koʼuinjachin püchikuaʼa tatuma», nümaka nümüin. Koʼukalaka nüchikuaʼa Saulo nutuma Ananías. Watta saalii kasa nütüjaka Saulo mapa nüchiki Jesuu otta nümaajanaichipa Jesuu nia. Woutiisashi nia otta oʼttushi nia sünain aküjaa pütchi namaa na nikirajüinkana  Jesuu suluʼu tü ekirajüleekalüirua judío. Ponokojosaʼa naaʼin na judíokana neʼrapa Saulo sünain ekirajaa wayuu nüchiki Jesuu. Majiraashii na judíokana: «¿Nnojoishisaʼa niain wayuukai chii chi eipiijapuʼukai na nikirajüinkana Jesuu?».

Aküjashi pütchi Saulo chaa Damasco soʼu apünüin juya. Aʼürülaanüshi Saulo natuma na judíokana otta ooniraashii nikiira süpüla noʼutuin naaʼin. Natüjaapa saaʼu na anoujashiikana nuʼutuneein aaʼin Saulo, nakaaliinjain nia. Soʼu wanee ai, nashakatirüin Pablo suluʼu kanaasüta suluʼupünaa wanee wentaana süpüchoʼumüin tü süsepükat tü pueulokot».

Nüntapa Saulo Jerusalénmüin, niʼreein na anoujashiikana. Nayasaʼa nayakana mmotshii neema. Niasaʼa Bernabé wanee wayuu anamia, niʼikajaain Saulo namaʼanamüin na aluwataaushiikana jee nüküjaka namüin suʼwanajaaitpain nukuwaʼipa Saulo. Nuutkajaaka joo Saulo namaa na anoujashii chajanakana Jerusalén otta aküjashi maʼin nia pütchi sümüin wayuu. Pablo münüshi nia atumawaa mapa.