Saulu yin tòvi Lomu tọn de he yin jiji to Talsu. Falesi de wẹ he yọ́n Osẹ́n Ju lẹ tọn ganji bosọ gbẹwanna Klistiani lẹ taun. E nọ dọ̀n Klistiani sunnu po yọnnu po lẹ sọn owhé yetọn lẹ gbè bo nọ sú yé do gànpamẹ. E tlẹ nọte bo to pinpọn to whenue gbẹtọgun he to adi ji de dlan zannu do devi Stefani hù.

Amọ́, Klistiani he to Jelusalẹm lẹ kẹdẹ wiwle ma ko pé Saulu. E biọ to yẹwhenọ daho si nado do e hlan tòdaho Damasku tọn mẹ, na e nido yangbé Klistiani he to finẹ lẹ tọn. Dile Saulu sẹpọ tòdaho lọ, hinhọ́n daho de họ́n lẹdo e to ajiji mẹ bọ e họ́jai. E sọ sè ogbè de dọmọ: ‘Saulu, naegbọn hiẹ do to homẹkẹndo mi?’ Saulu kanse dọ: ‘Hiẹ mẹnu wẹ?’ Ogbè lọ gblọn dọmọ: ‘Yẹn Jesu wẹ. Yì Damasku, a nasọ sè nuhe a dona wà.’ To afọdopolọji, Saulu lẹzun nukuntọ́nnọ, bọ mẹdevo wẹ dona hẹn alọ go na ẹn biọ tòdaho lọ mẹ.

Klistiani nugbonọ de tin to Damasku he nọ yin Ananias. Jesu dọna ẹn to numimọ mẹ dọmọ: ‘Yì owhé Juda tọn gbè to aliho he nọ yiylọdọ Jijlọ lọ ji bo dín Saulu mọ.’ Ananias dọmọ: ‘Oklunọ, n’yọ́n dawe enẹ ganji! E nọ wle devi towe lẹ sú do gànpamẹ!’ Ṣigba, Jesu dọna ẹn dọ: ‘Yì e dè. Yẹn ko de Saulu nado dọyẹwheho wẹndagbe lọ tọn na akọta susu.’

Enẹwutu, Ananias yì dín Saulu mọ bo dọna ẹn dọ: ‘Mẹmẹsunnu Saulu, Jesu ko do mi hlan nado wá hunnukun na we.’ To afọdopolọji, Saulu jẹ numọ ji. E sọ plọnnu gando Jesu go bo lẹzun hodotọ etọn. Todin he Saulu ko yin bibaptizi taidi Klistiani de, e jẹ yẹwhehodọ ji to sinagọgu lẹ mẹ to pọmẹ hẹ Klistiani hatọ etọn lẹ. Be a sọgan yí nukun homẹ tọn do pọ́n lehe e na ko paṣa Ju lẹ nado mọdọ Saulu to nuplọn  mẹlẹ gando Jesu go do ya? Yé dọmọ: ‘E ma yin dawe he nọ yangbé devi Jesu tọn lẹ tọn dai lọ die ya?’

Na owhe atọ̀n, Saulu dọyẹwheho na mẹhe nọ nọ̀ Damasku lẹ. Ju lẹ gbẹwanna Saulu bo kàn ayiha nado hù i. Ṣigba, mẹmẹsunnu lẹ sè gando sébibla lọ go bo gọalọna ẹn nado họ̀ngán. Yé ze e do ohà mẹ bo hẹn ẹn jẹte gbọn nùvo adó tòdaho lọ tọn de mẹ.

Whenue Saulu yì Jelusalẹm, e tẹnpọn nado kọnawudopọ hẹ mẹmẹsunnu he to finẹ lẹ. Ṣigba, yé to budina ẹn. Whenẹnu wẹ devi he jọmẹ de he nọ yin Balnaba plan Saulu wá apọsteli lẹ dè bo hẹn yé kudeji dọ Saulu ko diọ nugbonugbo. Saulu jẹ wẹndagbe lọ lá ji po zohunhun po to pọmẹ hẹ agun he to Jelusalẹm. To godo mẹ, e wá yin yinyọnẹn taidi Paulu.