Si Saulo isa ka Romano nga natawo sa Tarso. Isa sia ka Fariseo nga eksperto sa Kasuguan sang mga Judiyo, kag akig gid sia sa mga Cristiano. Ginaguyod niya ang babayi kag lalaki nga mga Cristiano paggua sa ila mga balay kag ginapapriso. Gintan-aw pa gani niya ang pagbato sang akig nga mga tawo kay Esteban asta mapatay.

Pero indi kontento si Saulo nga ang mga Cristiano lang sa Jerusalem ang dakpon. Ginpangabay niya ang mataas nga saserdote nga ipadala sia sa siudad sang Damasco para dakpon ang mga Cristiano didto. Sang malapit na si Saulo sa siudad, gulpi lang may nagkirab nga kasanag sa palibot niya, kag natumba sia. May nabatian sia nga tingog nga nagsiling: “Saulo, ngaa ginahingabot mo ako?” Namangkot si Saulo: “Sin-o ka?” Nagsabat ini: ‘Ako si Jesus. Kadto ka sa Damasco para mahibaluan mo ang dapat mo himuon.’ Gulpi lang nabulag si Saulo kag kinahanglan sia tuytuyan pakadto sa siudad.

May matutom nga Cristiano sa Damasco nga ang ngalan amo si Ananias. Ginsilingan sia ni Jesus paagi sa palanan-awon: ‘Kadto ka sa balay ni Judas sa dalan nga ginatawag Matadlong, kag pangitaa si Saulo.’ Si Ananias nagsiling: ‘Ginuo, kilala ko ina nga tawo! Ginapapriso niya ang imo mga disipulo!’ Pero si Jesus nagsiling: ‘Kadtui sia. Kay ginpili ko si Saulo sa pagbantala sang maayong balita sa madamo nga pungsod.’

Nakita ni Ananias si Saulo kag ginsilingan ini: ‘Saulo, utod ko, ginpadala ako ni Jesus para buksan ang imo mga mata.’ Dayon makakita na liwat si Saulo. Nagtuon sia parte kay Jesus kag nangin iya sumulunod. Nabawtismuhan si Saulo bilang Cristiano, kag ginsugdan niya ang pagbantala sa mga sinagoga upod sa iban nga Cristiano. Maimadyin mo  bala ang kakibot sang mga Judiyo sang nakita nila si Saulo nga nagatudlo parte kay Jesus? Nagsiling sila: ‘Indi bala amo ini ang tawo nga naghingabot sa mga disipulo ni Jesus?’

Tatlo ka tuig nga nagbantala si Saulo sa mga tawo sa Damasco. Naakig ang mga Judiyo kay Saulo kag nagplano sila nga patyon sia. Pero nabal-an sang mga utod ang ila plano gani ginbuligan nila sia nga makapalagyo. Ginbutang nila sia sa alat kag ginpapanaug ini paagi sa bintana sang pader sang siudad.

Sang nagkadto si Saulo sa Jerusalem, gusto niya makig-upod sa mga utod didto. Pero nahadlok sila sa iya. Dayon gindala sang mabuot nga disipulo nga si Bernabe si Saulo sa mga apostoles kag ginkumbinsi sila nga nagbag-o na gid si Saulo. Nangin mapisan gid si Saulo sa pagbantala sang maayong balita upod sa kongregasyon sa Jerusalem. Sang ulihi, nakilala sia bilang Pablo.