Saulus wa ri omuture waRoma ngwa kwaterwa moTarsus. Eye wari Omufarisei nu ngwa ri onongo mOmatwako wOvajuda, nu wa tondere Ovakriste. Eye aa kokozorere Ovakriste ovarumendu novakazendu pendje nokuveyumba mondeko. Eye wina aa tarere otjimbumba tjovandu ovindandi tjaatji vete omuhongewa wena Stefanus nomawe nokumuzepa.

Saulus kaa kambura Ovakriste moJerusalem uriri. Posiya eye wina wa ningira omupristeri omunene okumuhinda kotjihuro tjaDamaskus kokutja ma kakambure Ovakriste ngo. Otja tjaa yendere otjihuro, mokamanga ondjerera onamasa ya yera ongondoroka naye, neye arire tja wire pehi. Eye wa zuva eraka nda tja: ‘Saulus, ongwaye tji mo ndji tatumisa?’ Saulus wa pura a tja: ‘Oove uṋe?’ Neraka ra tja nai: ‘Owami Jesus. Hita moDamaskus, nu mokerihonga kutja mosokuungura tjike.’ Moruveze rwatjimanga Saulus wa poṱupara, nu aa hepa omundu ngu me mu hongorere okuhita motjihuro.

MoDamaskus, mwa ri omurumendu omuṱakame wena Ananias. Jesus we mu raera motjirimunikise a tja: ‘Twende kondjuwo yaJudas mOmuvanda Omusembame nu u pahe Saulus.’ Ananias wa tja: ‘Muhona, ami me tjiwa avihe ohunga nomurumendu ngo! Eye u yumba ovahongewa voye mondeko!’ Posiya Jesus wa tja: ‘Twende ku ye. Ami mba toorora Saulus kutja ma zuvarise ombuze ombwa koviwaṋa ovingi.’

Okutja Ananias wa ya ku Saulus na tja ku ye: ‘Mukwetu Saulus, Jesus we ndji hindi kutja mbi yekukupaturura omeho.’ Nu tjimanga Saulus wa uta okumuna rukwao. Eye we rihonga ohunga na Jesus na rire omuhongewa we. Nai ngwa papitisiwa otjOmukriste, Saulus wa uta okuzuvarisa mozondjuwo zomaworonganeno wombongo puna Ovakriste ovakwao. Ripura uriri kutja  Ovajuda va himinwe vi tji va muna Saulus ama hongo ovandu ohunga na Jesus! Owo va tja: ‘Hapo omurumendu ngwi kaye ngwi ngwaa kambura ovahongewa vaJesus?’

Oure wozombura 3, Saulus wa zuvarisira ovandu mba turire moDamaskus. Ovajuda va tondere Saulus nu aave paha omiano vyokumuzepa. Posiya ovakambure ovakwao va tjiwa ohunga nondando yawo nave mu vatere okuyepa oumba. Owo ve mu twa mokambamba nave mu herurire mondovi yomira yotjihuro.

Indu Saulus tja ya koJerusalem, eye wa kondja okurikwamba kovakambure ngo. Posiya owo aave mu tira. Nungwari omuhongewa wena Barnabas ngwa ri notjari wa eta Saulus kovaapostele neve zuvisa kutja Saulus tjiri wa runduruka. Saulus wa uta okuzuvarisa ombuze ombwa nouvanḓe pu nombongo moJerusalem. Eye kombunda aa tjiukwa otja Paulus.