Saul seiku rayat menua Rome ke ada ba Tarsus. Iya seiku orang Parisi ke landik ba Adat orang Judah, lalu iya begedika orang Kristian. Iya ngirit orang Kristian ke lelaki enggau indu pansut ari rumah lalu ngurung sida ba rumah jil. Lebuh seraban orang ke ringat nuku Stepen ngena batu nyentukka mati, iya mega bisi dia, meratika pengawa sida.

Tang Saul enda puas semina nangkap orang Kristian ba Jerusalem aja. Iya minta imam besai nganjung iya ngagai nengeri Damaskus ngambika ulih nangkap orang Kristian ba nengeri nya. Lebuh Saul semak enggau Damaskus, penampak ti terang manchar enggau ngenyit ngelingi iya nyentukka iya rebah ke tanah. Iya ninga nyawa bejaku: ‘Saul, nama kebuah nuan merinsaka aku?’ Saul nanya: ‘Sapa nuan?’ Nyawa nya nyaut: ‘Aku Jesus. Mupuk ngagai Damaskus, nuan deka nemu utai ti deka dikereja nuan.’ Tekala nya, Saul nyadi buta. Nya alai, iya patut diiring ngagai Damaskus.

Ba Damaskus, bisi seiku orang Kristian ke tetap ati benama Ananias. Jesus bejaku enggau iya dalam genera: ‘Mupuk nuan ngagai rumah Judas ba jalai ke dikumbai Rurus, lalu giga Saul.’ Ku Ananias: ‘Tuan, aku nemu semua pasal lelaki tu! Iya balat ngurung bala murid nuan ba rumah jil!’ Tang Jesus nyaut: ‘Mansang nuan ngagai iya. Aku udah milih Saul madahka berita manah ngagai bansa bukai.’

Ananias lalu betemu enggau Saul sereta madahka iya: ‘Menyadi, Saul, Jesus ngasuh aku datai ngambika nuan ulih meda baru.’ Tekala nya, Saul ulih meda baru. Iya belajar pasal Jesus lalu nyadi murid iya. Pengudah iya dibaptisa nyadi orang Kristian, Saul berengkah ngajar ba balai gempuru enggau menyadi  Kristian ke bukai. Ulih nuan ngambarka orang Judah ke tekenyit lebuh meda Saul ngajar orang mayuh pasal Jesus? Ku sida: ‘Ukai enda iya tu ke udah nangkap murid Jesus?’

Pengelama tiga taun, Saul nginjil ngagai orang ke diau ba Damaskus. Orang Judah begedika Saul lalu bepekat deka munuh iya. Tang bala menyadi Kristian nemu pasal pelan nya lalu nulung iya ngerarika diri. Sida ngengkahka iya ba bakul lalu ngulurka iya ari lubang ba dinding kuta.

Lebuh Saul datai ba Jerusalem, iya nguji begulai enggau menyadi Kristian dia. Tang sida takut enggau iya. Udah nya, bisi seiku menyadi ti manah ke benama Barnabas mai Saul betemu enggau bala rasul lalu nulung sida pechaya Saul amat udah berubah. Saul nginjil enggau ransing pasal berita manah enggau eklisia ba Jerusalem. Nyau kelama, iya dikumbai Paul.