Ni Saulo ket maysa nga umili ti Roma a nayanak idiay Tarso. Isu ket maysa a Fariseo nga eksperto iti Linteg dagiti Judio. Kagurgurana dagiti Kristiano. Ul-ulodenna dagiti Kristiano a lallaki ken babbai nga iruar kadagiti balayda sana ibalud. Binuyana pay ti panangubor dagiti makapungpungtot a tattao iti adalan a ni Esteban agingga a natay.

Ngem saan a kontento ni Saulo a dagiti laeng Kristiano idiay Jerusalem ti maarestona. Kiniddawna iti nangato a padi a palubosanna a mapan iti siudad ti Damasco tapno maarestona dagiti Kristiano sadiay. Idi asidegen a makadanon iti siudad, bigla nga adda makasisirap a lawag a nagraniag iti aglawlawna ket napaidda. Adda nangngegna a boses a nangibaga: ‘Saulo, apay nga idaddadanesnak?’ Insaludsod ni Saulo: ‘Asinoka?’ Insungbatna: ‘Siak ni Jesus. Mapanka idiay Damasco ket maammuamto ti masapul nga aramidem.’ Bigla a saan a nakakita ni Saulo ket nakibin a napan iti siudad.

Adda matalek a Kristiano nga agnagan Ananias idiay Damasco. Babaen iti sirmata, imbaga ni Jesus kenkuana: ‘Mapanka iti balay ni Judas iti kalsada a maawagan Nalinteg, ket birokem ni Saulo.’ Imbaga ni Ananias: ‘Apo, am-ammok dayta a tao! Ibalbaludna dagiti adalan!’ Ngem imbaga ni Jesus: ‘Mapanka kenkuana. Pinilik ni Saulo a mangikasaba iti naimbag a damag iti adu a nasion.’

Binirok ni Ananias ni Saulo ket imbagana: ‘Saulo, kabsat, imbaonnak ni Jesus tapno paimbagenka.’ Dagus a nakakita manen ni Saulo. Nasursurona ti maipapan ken Jesus ket nagbalin a pasurotna. Idi nabautisaranen, nangasaba ni Saulo kadagiti sinagoga a kaduana dagiti kapammatianna. Mapanunotmo kadi ti reaksion dagiti Judio idi  nakitada ni Saulo a mangisursuro maipapan ken Jesus? Imbagada: ‘Di kad daytoy tay lalaki a mangar-aresto kadagiti adalan ni Jesus?’

Tallo a tawen a nangaskasaba ni Saulo idiay Damasco. Kagurgura isuna dagiti Judio ket implanoda a patayen. Ngem naammuan dayta dagiti kakabsat ket tinulonganda a makalibas. Inkabilda iti basket sada imbaba iti abut iti pader ti siudad.

Idi napan ni Saulo idiay Jerusalem, kayatna ti makikadua kadagiti kakabsat ngem mabutengda kenkuana. Idi kuan, adda nasingpet nga adalan nga agnagan Bernabe a nangipan ken Saulo kadagiti apostol ket kinombinsirna ida a talaga a nagbalbaliwen ni Saulo. Kalpasanna, sireregtan a nangaskasaba ni Saulo a kadua ti kongregasion idiay Jerusalem. Idi agangay, isu ket naawagan iti Pablo.