Sọl yọ ohwo Rom nọ a yẹ evaọ Tasọs. Ọ jọ ohwo Farisi nọ ọ riẹ izi ahwo Ju gaga, yọ o mukpahe Ileleikristi. Ọ jẹ hai kpohọ iwou Ileleikristi, o ve mu ai je fi ai họ uwou-odi. Evaọ okenọ a jẹ rọ itho fi Stivin kpe dede, Sọl ọ jọ etẹe.

Rekọ Ileleikristi nọ ọ jẹ hai mu evaọ Jerusalẹm na u te kẹe he. Ọ tẹ nyae ta kẹ ozerẹ okpehru na re ọ kẹe uvẹ kpobọ Damaskọs, re ọ nyai mu Ileleikristi nọ e rrọ obei fihọ uwou-odi. Nọ Sọl ọ kẹle okpẹwho na no, idudhe na elo ọnwranwra jọ o te lo mu iei, o te kie fihọ otọ. O te yo urru jọ nọ o ta nọ: ‘Sọl, fikieme who bi ro kpokpo omẹ?’ Sọl ọ tẹ nọ inọ: ‘Whẹ yọ ono?’ O te yo kẹe inọ: ‘Mẹ yọ Jesu. Kpobọ Damaskọs, a te jọ obei vuẹ owhẹ oware nọ who ti ru.’ Ẹsiẹvo na, Sọl o te tuaro, a te kru ei obọ kpobọ okpẹwho na.

Oleleikristi jọ nọ a re se Ananayas ọ jọ Damaskọs. Jesu ọ tẹ vuẹe evaọ eruẹaruẹ inọ: ‘Kpobọ uwou Judas nọ o rrọ iyẹrẹ nọ a re se Ọliọliọ, re whọ nọ onọ Sọl.’ Ananayas ọ tẹ ta nọ: ‘Olori, mẹ riẹ ọzae yena ziezi, o bi mu ilele ra fihọ uwou-odi!’ Rekọ Jesu ọ tẹ ta kẹe nọ: ‘Nyabru Sọl, mẹ salọ e riẹ no re ọ ta usiuwoma kẹ erẹwho buobu.’

Ananayas ọ tẹ nyabru Sọl, ọ tẹ rọ abọ kpahe iẹe uzou jẹ ta nọ: ‘Sọl, oniọvo, Jesu o vi omẹ ze re me rovie aro ra.’ Ẹsiẹvo na, Sọl o te mu ude họ ẹruẹ. O te wuhrẹ kpahe Jesu je zihe ruọ olele riẹ. Nọ Sọl ọ họ-ame no, o te kuomagbe Ileleikristi nọ e jọ Damaskọs mu usiuwoma họ ẹta evaọ iwou-egagọ. Kọ whọ sai roro epanọ akpọ o gbe ahwo Ju unu te  nọ a ruẹ Sọl nọ o bi wuhrẹ ahwo kpahe Jesu? A tẹ be ta nọ: ‘Kọ ogbẹrọnọ ọzae nana o je kpokpo ilele Jesu na?’

Ikpe esa soso Sọl ọ ta usiuwoma kẹ ahwo nọ a be rria Damaskọs. Ahwo Ju a te mukpahe Sọl jẹ gba ẹgwae nọ a re kpei no. Rekọ nọ inievo na a riẹ kpahe ẹgwae omuomu na, a te fiobọhọ kẹe dhẹ vabọ. A wọe fihọ ekete jẹ rọ eghogho jọ evaọ ugbẹhẹ okpẹwho na si ei fihọ otọ.

Nọ Sọl o te obọ Jerusalẹm, ọ tẹ gwọlọ kuomagbe inievo nọ e rrọ obei. Rekọ ozọ riẹ u je mu ai. Olele jọ nọ a re se Banabas o te su ei bru ikọ na jẹ vuẹ ae nọ Sọl o gine nwene no. Sọl o te kuomagbe ukoko nọ o jọ Jerusalẹm, yọ ọ jẹ rọ ajọwha ta usiuwoma na. Uwhremu na a te je sei Pọl.