Ve mũndũũme Mũlomi weetawa Saulo, na asyaĩwe Taliso. Mũndũũme ũsu aĩ Mũvalisi na nĩweesĩ nesa vyũ Mĩao ya Ayuti, ĩndĩ nĩwamenete Aklĩsto mũno. Aendaa nyũmba syoo na ayumaalya na vinya aũme na aka ala maĩ Aklĩsto na aimatwaa yela. O na yĩla ala andũ athatu mũno mamũkimangie Sitivini na mavia nginya akwʼa, Saulo aũngamĩte ũtee woo amasyaĩĩsye.

O na ũu wĩ o vo, Saulo ndeewʼaa e mwĩanĩe no kũmakwata na kũmatwaa yela Aklĩsto ala maĩ Yelusaleme yĩ yoka. Nĩweetisye mũthembi mũnene mwanya nĩ kana athi Ndamasiku na aikwata Aklĩsto ala maĩ kũu. Saulo aendete na e vakuvĩ vyũ kũvika ndũanĩ ĩsu, kyeni kyaĩ kingĩ mũno nĩkyamũmulĩkile na kyatuma avalũka nthĩ. Ĩtina wa ũu, nĩweewie wasya ũimwĩa: ‘Saulo, nĩkĩ ũũnthĩnyʼa?’ Nake Saulo asũngĩa asya: ‘Nue ũũ?’ Na ĩndĩ eewʼa wasya ũngĩ ũyasya: ‘Ninyie Yesũ. Lika ndũanĩ ya Ndamasiku na nũũtavwʼa kĩla waĩle kwĩka.’ Ĩvindanĩ yĩu Saulo woonie kyeni nĩwaekie kwona na kwoou yaĩ no nginya mũndũ ũngĩ amũtongoesye alike ndũanĩ.

Ndũanĩ ĩsu ya Ndamasiku vaĩ na Mũklĩsto mũĩkĩĩku weetawa Anania. Yesũ nĩwamumĩlĩĩile Anania na amwĩa atĩĩ: ‘Enda mũsyĩ kwa mũndũ wĩtawa Yutasi ũla wĩ nzĩanĩ nene yĩtawa Ndũngalu, na ũikũlya mũndũ wĩtawa Saulo.’ Nake Anania amũsũngĩa Yesũ amwĩa: ‘Mwĩaĩi, nĩnĩsĩ nesa maũndũ ala mũndũ ũsu wĩkaa. Aendeee kũkwata amanyĩwʼa maku na aimekya yela.’ Ĩndĩ Yesũ amwĩa: ‘Thi ũkamũmanthe. Nĩnĩnyuvĩte Saulo ethĩwe mũtavanyʼa wa ũvoo mũseo mbaĩnĩ mbingĩ.’

Anania nĩwaendie na amwona Saulo, na ĩndĩ amwĩa: ‘Mwana-a-asa, Saulo, Yesũ nũndũmĩte ngũvingũe metho.’ Ndatĩkanĩ o ĩsu, Saulo nĩwambĩĩie kwona ĩngĩ. Nĩweemanyĩisye maũndũ maingĩ ĩũlũ wa Yesũ na ĩndĩ atwʼĩka mũatĩĩi wake. Amina kũvatiswa na kũtwʼĩka Mũklĩsto, nĩwambĩĩie kũtavanyʼa masinakokenĩ e vamwe na Aklĩsto ala  angĩ. We wĩona Ayuti ta masengʼie ata yĩla moonie Saulo aimanyĩsya andũ ĩũlũ wa Yesũ? Maisye atĩĩ: ‘We ũũ tyo ũla mũndũ ũnakwataa amanyĩwʼa ma Yesũ na aimekya yela?’

Saulo aendeeie kũtavanyʼa ndũanĩ ya Ndamasiku vandũ va myaka ĩtatũ. Ũu watumie Ayuti ala maĩ ndũanĩ ĩsu mamũmena mũno na ĩndĩ mavanga kũmũaa. Ĩndĩ yĩla ana-a-asa mamanyie ũndũ ũsu, nĩmamũtetheeisye Saulo kwĩvitha ndakoawe. Moosie kĩkavũ, mamwĩkĩa Saulo vo, na mamũtheeelya ĩimanĩ yaĩ ũkũtanĩ wa ndũa ĩsu.

Ĩtina wa vau, Saulo nĩwaendie Yelusaleme, na atata ũndũ ũtonya ekalanyʼe na ana-a-asa. Ĩndĩ nĩmamũkĩaa. Nĩvo ĩndĩ mũmanyĩwʼa ũmwe weetawa Valanava woosie Saulo na amũtwaa kũla kwĩ atũmwa na amaĩkĩĩthya vyũ kana kwa wʼo Saulo nĩwaalyũkĩte. Ĩtina wa kavinda kanini Saulo nĩwambĩĩie kũtavanyʼa ũvoo mũseo na kĩthito e vamwe na kĩkundi kĩla kyaĩ Yelusaleme. Saulo nĩwesie kwambĩĩa kwĩtawa Vaulo.