Laj Saulo tzʼaqal aj Roma ut xyoʼlaak Tarso. Aʼan aj Pariseey ut naxnaw chiʼus li xchaqʼrabʼebʼ laj Judiiy ut xikʼ narilebʼ laj paabʼanel. Naxjukukihebʼ chirix rochoch, winq ut ixq, ut naxchʼikebʼ saʼ tzʼalam. Joʼkan ajwiʼ, xaqxo chi ilok naq jun tuubʼ chi poyanam, li jwal josqʼebʼ, yookebʼ xkamsinkil chi pek laj Esteban.

Abʼan, laj Saulo inkʼaʼ kitzʼaqlok chiru xkʼebʼal saʼ tzʼalam ebʼ laj paabʼanel re Jerusalen. Joʼkan naq kixye re li xyuwaʼil aj tij naq ttaqlaaq Damasco re xrahobʼtesinkilebʼ ajwiʼ li wankebʼ aran. Laj Saulo ak wank chixkʼatq li tenamit naq jun li nimla xaml xkutanobʼresink re chi xsutam, ut xtʼaneʼk saʼ chʼochʼ. Tojaʼ naq, kirabʼi jun xyaabʼ kuxej: «Saulo, kʼaʼut yookat inrahobʼtesinkil?». Laj Saulo kixye re: «Anihat?». Li xyaabʼ kuxej kixye: «Laaʼin li Jesus. Ayu Damasco, ut aran teʼxye aawe li tento taabʼaanu». Saʼ li hoonal aʼan, laj Saulo kikanaak chi mutzʼ, ut keʼxchʼilo chi ruqʼ toj saʼ li tenamit.

Saʼ Damasco wank chaq jun laj paabʼanel li naxkʼabʼaʼi Ananias. Li Jesus kixye re saʼ jun li moy u: «Ayu saʼ rochoch laj Judas, saʼ li bʼe li naxkʼabʼaʼi Tiikil bʼe, ut sikʼ laj Saulo». Laj Ananias kixye: «Qaawaʼ, wabʼihom naabʼal chirix li winq aʼin. Yook xkʼebʼalebʼ laatzolom saʼ tzʼalam». Abʼan li Jesus kixye re: «Ayu xsikʼbʼal, xbʼaan naq insikʼom ru laj Saulo re naq tixpuktesi li chaabʼil esil chirix li Yos saʼ naabʼal chi tenamit».

Joʼkan naq, laj Ananias xkoho xsikʼbʼal ut kixye chaq re: «Saulo, at wiitzʼin, li Jesus xtaqlank chaq we re naq tat-iloq». Saʼ junpaat, kiʼilok. Kixtzol ebʼ li naʼlebʼ chirix li Jesus ut kiʼok choʼq xtzolom. Kixsubʼ ribʼ saʼ haʼ ut kiʼok chi puktesink saʼebʼ li chʼutlebʼaal rochbʼenebʼ li rech aj paabʼanel. Kʼajoʼ tana keʼsachk xchʼool ebʼ laj Judiiy, peʼyaal? Anaqwan nekeʼril chik naq laj Saulo  yook chi aatinak chirix li Jesus rikʼinebʼ li poyanam. Ebʼ laj Judiiy nekeʼxye chiribʼilebʼ ribʼ: «Ma maawaʼ li winq aʼin li narahobʼtesink rehebʼ li xtzolom li Jesus?».

Chiru oxibʼ chihabʼ, laj Saulo kipuktesink Damasco. Xikʼ kiʼileʼk xbʼaanebʼ laj Judiiy ut keʼxkʼubʼ xkamsinkil. Abʼan naq ebʼ li rech aj paabʼanel keʼxnaw aʼin, keʼxtenqʼa chi elelik. Keʼxkubʼsi saʼ jun li chakach saʼ xhopolal xsuttzʼakil li tenamit.

Naq laj Saulo kiwulak Jerusalen, kixyal rilbʼalebʼ chaq ebʼ li rech aj paabʼanel. Abʼan, ebʼ laj paabʼanel aʼin teʼxuwaq xbʼaan. Tojaʼ naq, laj Bernabe, jun rehebʼ li chaabʼil tzolom, kixkʼam laj Saulo rikʼinebʼ li Apostol ut kixkʼut chiruhebʼ naq relik chi yaal naq kixjal xnaʼlebʼ. Laj Saulo kiʼok saʼ xyanq li chʼuut re Jerusalen ut chi sa saʼ xchʼool kiʼok xpuktesinkil li chaabʼil esil chirix li Yos. Saʼ xnumik ru ebʼ li po, ebʼ li poyanam keʼok xyeebʼal re Pablo.