Saulu aarĩ Mũroma na aaciarĩirũo Tariso. Aarĩ Mũfarisai wathomeire Watho wa Kĩyahudi na nĩ aathũire Akristiano mũno. Aarutũrũraga athuri na atumia Akristiano kuuma mĩciĩ-inĩ yao na akamaikia njera. O na nĩ aarũgamĩrĩire kĩrĩndĩ kĩarĩ na marakara gĩkĩhũra Stefano na mahiga nginya agĩkua.

No Saulu ndaaiguaga aiganĩire nĩ ũndũ wa kũnyita Akristiano arĩa maarĩ Jerusalemu tu. Nĩ aahoire mũthĩnjĩri-Ngai mũnene rũtha rwa gũthiĩ itũũra-inĩ rĩa Dameski nĩguo agacarie Akristiano arĩa maaikaraga kuo. Rĩrĩa aakuhĩrĩirie itũũra rĩu, kwoimĩrire ũtheri mũnene o rĩmwe ũkĩmũmũrĩka mĩena yothe na akĩgũa thĩ. Aaiguire mũgambo woiga ũũ: ‘Saulu, ũranyarira nĩkĩ?’ Saulu oririe ũũ: ‘Wee nĩwe ũ?’ Agĩcokerio ũũ: ‘Nĩ niĩ Jesu. Thiĩ Dameski na nĩ ũkwĩrũo ũrĩa wagĩrĩirũo nĩ gwĩka.’ Saulu nĩ aatuĩkire mũtumumu o rĩmwe ũũ atĩ anyitirũo guoko nĩguo akinye Dameski.

Kũu Dameski nĩ kwarĩ na Mũkristiano mwĩhokeku wetagwo Anania. Jesu aamwĩrire ũũ kũgera kĩoneki: ‘Thiĩ kwa Judasi njĩra-inĩ ĩrĩa ĩtagwo Nũngarũ, na ũcarie mũndũ wĩtagwo Saulu.’ Nake Anania akĩmwĩra: ‘Mwathani, nĩ njũĩ maũndũ mothe megiĩ mũndũ ũcio! Araikia arutwo aku njera!’ No Jesu akĩmwĩra ũũ: ‘Thiĩ kũrĩ we. Nĩ ndĩmũthurĩte nĩguo ahunjie ũhoro ũrĩa mwega kũrĩ ndũrĩrĩ nyingĩ.’

Nĩ ũndũ ũcio Anania nĩ aathiire gũcaria Saulu na akĩmwĩra: ‘Mũrũ wa Ithe witũ Saulu, Jesu andũma kũrĩ we ngũhingũre maitho.’ O hĩndĩ ĩyo Saulu nĩ aambĩrĩirie kuona rĩngĩ. Nĩ eerutire ũhoro wĩgiĩ Jesu na agĩtuĩka mũrũmĩrĩri wake. Thutha wa kũbatithio na gũtuĩka Mũkristiano, Saulu nĩ aambĩrĩirie kũhunjia thunagogi-inĩ arĩ hamwe  na Akristiano arĩa angĩ. Ta hũũra mbica ũrĩa Ayahudi maamakire rĩrĩa monire Saulu akĩrutana ũhoro wĩgiĩ Jesu. Moigire ũũ: ‘Na githĩ ũyũ ti mũndũ ũrĩa ũratharĩkagĩra arutwo a Jesu?’

Kwa ihinda rĩa mĩaka ĩtatũ, Saulu nĩ aahunjagĩria aikari a Dameski. Ayahudi nĩ maamenete Saulu mũno na nĩ maabangire kũmũũraga. No ariũ a Ithe witũ a kũu nĩ maamenyire mũbango ũcio na makĩmũteithĩrĩria kũũra. Maamwĩkĩrire gĩkabu-inĩ na makĩmũharũrũkĩria irima rĩarĩ rũthingo-inĩ rwa itũũra.

Rĩrĩa Saulu aakinyire Jerusalemu, nĩ aageririe kũnyitanĩra na ariũ a Ithe witũ a kũu, no nĩ maamwĩtigagĩra. Thutha ũcio, mũrutwo ũmwe wetagwo Baranaba nĩ aatwarire Saulu kũrĩ atũmwo na akĩmaiguithia atĩ nĩ aagarũrũkĩte biũ. Saulu nĩ aambĩrĩirie kũhunjia ũhoro ũrĩa mwega hamwe na kĩũngano kĩrĩa kĩarĩ Jerusalemu arĩ na kĩyo. Aacokire akĩambĩrĩria gwĩtagwo Paulo.