Saulo wajinga mwina Loma wasemekejilwe mu muzhi wa Talasusa. Wajinga Mufaliseo wafunjile Mizhilo ya Bayudea kabiji washikilwe bingi bena Kilishitu. Wakwatanga banabalume ne banabakazhi bena Kilishitu ne kwibakasa mu kaleya. Kabiji wajingapo ne kimye jibumba ja bantu po jaipayilenga Setepena na mabwe.

Saulo wakebelenga ne kukasa bena Kilishitu bajinga mu mizhi ikwabo, kechi ba mu Yelusalema monkatu ne. Walombele luusa ku bañanga bakatampe kuba’mba bamuswishe aye ku Damasakasa na kukasa bena Kilishitu. Saulo byo ayilenga na kunangijila ku Damasakasa, ponkapotu kyeya kyamusamijile kufuma mwiulu, ne aye waponene panshi kabiji waumvwine jiwi saka jaamba’mba: ‘Saulo, mambo ka o ubena kummanyikila?’ Saulo waipwizhe’mba: “Nanchi yenu bañanyi?” Bamukumbwile’mba: ‘Amiwa yami Yesu. Imana ukatwele mu Damasakasa, momo basakukubula byo wafwainwa kuba.’ Ponkapo ne meso anji alekele kumona. Saulo bamukwachiletu ku maboko pa kutwela mu muzhi.

Mu Damasakasa mwajinga mwina Kilishitu wa kishinka wa jizhina ja Ananyasa. Yesu wamubuujile mu kimwesho amba: ‘Imana, uyenga mu mukwakwa utelwa’mba Waoloka, ukepuzhe ku nzubo ya kwa Yudasa muntu wa jizhina ja Saulo.’ Ananyasa waambile’mba: ‘Nkambo, naumvwa ku bantu bavula pa uno muntu! Ubena kukwata baana benu ba bwanga ne kwibataya mu kaleya.’ Yesu wamwambijile’mba: ‘Yanga! Mambo uno muntu yeye nasala kuba’mba asapwile mambo awama ku bisaka bya bantu.’

Ananyasa wayile kwajinga Saulo ne kumwambila’mba: ‘Saulo mulongo wami, Yesu ye wantuma kuba’mba nkulabishe meso.’ Ponkapotu Saulo watendekele kumona. Wafunjile pe Yesu ne kwikala mwananji wa bwanga. Wabatizhiwe ne kwikala mwina Kilishitu. Watendekele kusapwila mu mashinagoga pamo na bakwabo bena Kilishitu. Bayudea bakuminye bingi pa  kumona Saulo na kufunjisha bantu pe Yesu. Baipwizhenga’mba: ‘Nanchi uno muntu kechi ye wamanyikilenga baana ba bwanga ba kwa Yesu nenyi?’

Saulo wasapwijile bantu ba mu muzhi wa Damasakasa pa myaka isatu. Bayudea bamushikilwe bingi Saulo kya kuba bafuukwilepo kumwipaya. Bino balongo byo baumvwine kino, bamujimwineko ne kumunyemesha. Bamubikile mu ntumbe ne kumuzenzumwina pangye pa kipenze kya nsakwa.

Saulo byo afikile mu Yelusalema, wakebelenga kukwatankana na baana ba bwanga. Bino bonse bamuchiinenga. Kepo mwana wa bwanga wajinga bingi na kifyele aye Banabasa atwajile Saulo ku batumwa na kwibalumbulwila kuba’mba Saulo waleka byo aubanga. Saulo watendekele kusapwila mambo awama na mukoyo mu bipwilo bya mu Yelusalema. Mukuya kwa kimye batendekele kumutela’mba Paulo.