Sɔl na bin wan Roman sitizin we bɔn na Tasɔs. In na bin Faresi we rili sabi di Ju Lɔ, ɛn i et Kristian dɛn. I bin de pul Kristian man ɛn uman dɛn na dɛn os dɛn ɛn put dɛn na prizin. I bin ivin tinap ɛn wach we bɔku pipul dɛn we vɛks ston Stivin te dɛn kil am.

Bɔt nɔto di Kristian dɛn na Jerusɛlɛm nɔmɔ Sɔl bin want fɔ arɛst. I aks di ay prist fɔ sɛn am na Damaskɔs so dat i go arɛst di Kristian dɛn we de de. As Sɔl go nia di siti, wan brayt layt flash pan am, ɛn i fɔdɔm na grɔn. I yɛri wan vɔys tɔk se: ‘Sɔl, wetin mek yu de mek a sɔfa?’ Sɔl aks am se: ‘Udat na yu?’ Di vɔys ansa am se: ‘Mi na Jizɔs. Go na Damaskɔs, ɛn yu go lan wetin yu nid fɔ du.’ Wantɛm wantɛm, Sɔl blayn, ɛn dɛn ol in an fɔ go insay di siti.

Wan fetful Kristian bin de na Damaskɔs we nem Ananayas. Jizɔs tɛl am na wan vishɔn se: ‘Go na Judas in os na di strit we dɛn kɔl Stret, ɛn luk fɔ Sɔl.’ Ananayas tɔk se: ‘Masta, a sabi ɔltin bɔt da man de! I de put yu disaypul dɛn na prizin!’ Bɔt Jizɔs tɛl am se: ‘Go to am. A dɔn pik Sɔl fɔ prich di gud nyuz na bɔku neshɔn dɛn.’

So Ananayas go mit Sɔl ɛn tɛl am se: ‘Sɔl, mi brɔda, Jizɔs sɛn mi fɔ kam mek yu si bak.’ Wantɛm wantɛm, Sɔl bigin fɔ si bak. I lan bɔt Jizɔs, ɛn i kam fɔ bi in disaypul. We Sɔl baptayz ɛn bi Kristian, i bigin fɔ prich na di Sinagɔg dɛn wit in kɔmpin Kristian dɛn. Yu ebul tink bɔt aw di Ju dɛn sɔprayz we dɛn si Sɔl de tich pipul dɛn bɔt Jizɔs? Dɛn tɔk se: ‘Dis nɔto di sem man we bin de arɛst Jizɔs in disaypul dɛn?’

Sɔl prich to di pipul dɛn na Damaskɔs fɔ tri ia. Di Ju dɛn et Sɔl ɛn dɛn mek plan fɔ kil am. Bɔt di brɔda dɛn kam fɔ no bɔt di plan, ɛn dɛn ɛp am fɔ rɔnawe. Dɛn put am insay baskɛt ɛn pas am na wansay we opin na di wɔl ɛn put am dɔŋ.

We Sɔl go na Jerusɛlɛm, i tray fɔ jɔyn di brɔda dɛn we de de. Bɔt dɛn bin de fred am. Bɔt wan gud disaypul we nem Banabas kam wit Sɔl to di apɔsul dɛn, ɛn i mek dɛn biliv se Sɔl dɔn rili chenj. Sɔl bigin fɔ prich di gud nyuz wit zil na di kɔngrigeshɔn na Jerusɛlɛm. Leta, dɛn bigin fɔ kɔl am Pɔl.