Luomaŋnɔɔ Sɔɔ wa ni. Nduyɛ chiee nda velu ndu wo wa Taasɔɔ ni. Falisiinɔ ndoo sina a Sawa Chuuwa okɔɔ tau wo o wa ni, nduyɛ yɛleŋ pila ndoo tul Kilisiɔŋnda ni. Mi ndoo soli Kilisiɔŋnda o chiɛila ndalaŋ niŋ, wana pɔnɔ ni, wana lanɔ ni, mbo kuɛ a nda sasɔɔ mbo kɔ wou nda o chiɛi manyumndo niŋ. Teleŋ waŋnda wa Stiiviŋ vii viiyo a poutaŋ haaa ma dii ndu wo, Sɔɔ wa isisi mbo wa tofaa.

Sɔɔ ndoo hini kɔl a Kilisiɔŋaa o wa nyɛpalaa tusioo choo Chulusalɛm nda le. Le hei, mbo kɔ nyuna wana bɛndu wanaa soliaa lasalaa, le mbo vem ndu Damasikɔɔ mbo kɔ tusi Kilisiɔŋaa wa loŋ nda nyɛpalaa choo. Mɛɛ o hiŋ le fuuluuwo Damasikɔɔ, mi paŋgeloo fula o choo choo niŋ mbo tiu ndu choo silɔ. Okoŋ mbo del lɛŋ. Mi Sɔɔ tuɛi diomndo aa: ‘Sɔɔ, le yɛɛnɛ ŋ cho yɛ ya nyɛpalaa tusioo choo?’ Mi Sɔɔ nyuna aa: ‘Num nɛɛnɛ?’ Mbo tuɛi mulioo aa: ‘Ya ni, Chiisu. Kɔ Damasikɔɔ, a cho num chɔm nyɛ ŋ nɔ ma tosa wo.’ Mi Sɔɔ suma o foofo koŋ choo. Nduyɛ ma saa ndu baa ma hel a ndu chiee.

Kilisiɔŋnɔ pilɛ wa Damasikɔɔ diola ndɔlaŋ aa Ananaya. Mi Chiisu dimul ndu o yilaŋndo niŋ aa: ‘Kɔ o chiɛi Chuda wo o nɛi nda veelu aa Nɛi Sakpoo wo, ma nyuna le Sɔɔ.’ Mi Ananaya dimi aa: ‘Masanɔɔ, I sina a laŋunɔ koŋ okɔɔ kpou! Ndu cho buɛiyaa numnda dɔwɔɔ o chiɛi manyumndo niŋ ni!’ Kɛ mi Chiisu dimul ndu aa: ‘Kɔ naa ndu chua. I hɛli ndu le mbo dimul wanaa bɔɔbɔɔ yooŋgu kɛndɔɔ.’

Mɛɛ Ananaya kuɛ mbo saaluŋ Sɔɔ, mbo dimul ndu aa: ‘Sɔɔ, puaapilɛnɔ nuu, Chiisu vem ya naa num chua le mi kumbi num hɔltaŋ.’ O foofo koŋ choo, mi Sɔɔ kandu vɛlɛ chɔɔ. Mbo pɛɛku a Chiisu okɔɔ, nduyɛ mbo simnuŋ buɛi ndɔɔ. Okoŋ, mbo sɔla yiŋɔɔ mbo simnuŋ Kilisiɔŋnɔɔ. Mi Sɔɔ kandu waŋnda yooŋgu kɛndɔɔ dimullo o chiɛila Chuuwa piɛi Mɛlɛkalaŋ niŋ, nda chaaŋaa nduaa Kilisiɔŋnda. Yiyaŋndɔ  niko mɛɛ kɔndɔfillo wa Chuuwa yɛ mɛɛ nda che Sɔɔ waŋnda pɛɛkoo a Chiisu okɔɔ. Ma nyuna aa: ‘O cho poo hoo le wa buɛiyaa Chiisu wa nyɛpalaa tusioo choo le?’

Le wɔsilaŋ la yaa, Sɔɔ wa wanaa wa Damasikɔɔ wa yooŋgu kɛndɔɔ dimullo. Mi Chuuwa tul Sɔɔ leyɛ, nduyɛ ma kɛɛsiaa le ndu diyɔɔ. Kɛ mɛɛ puaapiliaa nduaa sina a kɛɛsiaa wɔɔŋndo hoo okɔɔ, ma mala ndu mbo nyaanuŋ. Ma wou ndu o kambɛiyo niŋ, ma keeku ndu o tɛɛŋgii saasa chioo, ma tusi ndu lekɔɔli.

Mɛɛ Sɔɔ kuɛ Chulusalɛm, mbo yeema le puaapiliaa wa loŋ nda holnɔŋndo. Kɛ siooŋnde wa nda le Sɔɔ. Buɛi pilɛ wa loŋ diolaŋ aa Banabaa. Mbo chua Sɔɔ, mbo kua a ndu o kiilaa lo, mbo chɔm nda maa wana siŋgaŋndo kpeekpei Sɔɔ cho niŋ ni. Mi Sɔɔ kandu waŋnda yooŋgu kɛndɔɔ dimullo a dialuŋ fulaa, nda wanaa wa o kundaa niŋ Chulusalɛm nda. Okoŋ kɔɔli, ma ke ndu diolaŋ aa Pɔɔl.