တၢ်မၤလိ ၉၆
ယ့ၣ်ၡူးဃုထၢထီၣ်စီၤစီလူး
စီၤစီလူးမ့ၢ် ရိမ့ၤအထံဖိကီၢ်ဖိ ဒီးအဝဲအိၣ်ဖျဲၣ်ထီၣ်လၢ ဝ့ၢ်တၢ်စူးအပူၤလီၤ. အဝဲမ့ၢ်ပှၤဖၤရံၤၡဲတဂၤလၢ အသ့ၣ်ညါပှၤယူဒၤဖိ အတၢ်သိၣ်တၢ်သီဂ့ၤဂ့ၤ ဒီးအဝဲသးဟ့ပှၤခရံာ်ဖိလီၤ. စီၤစီလူးလဲၤဝဲလၢ ပှၤခရံာ်ဖိအဟံၣ်တဖၣ်, ဖီၣ်န့ၢ်အဝဲသ့ၣ်ဒီး ပၢနုာ်ဝဲလၢဃိာ်ပူၤလီၤ. ဖဲပှၤဂီၢ်မုၢ်ကွံာ်သံ စီၤစတ့းဖၣ်လၢလၢၢ်အခါ စီၤစီလူးဆၢထၢၣ်ကွၢ်ဝဲစ့ၢ်ကီးလီၤ.
စီၤစီလူးဟးဖီၣ်ဝဲ ပှၤခရံာ်ဖိလၢ ဝ့ၢ်ယရူၤၡလ့ၣ်အပူၤ ဘၣ်ဆၣ် အသးတမံဒံးဘၣ်. အဃိ အဝဲမၢပှၤလုၢ်တၢ်အခိၣ် ဆှၢလီၤအီၤဆူဝ့ၢ်ဒၤမ့ၤစ့း ဒ်သိးကဟးဖီၣ်ဝဲပှၤခရံာ်ဖိလၢ အအိၣ်ဖဲန့ၣ်တဖၣ်အဂီၢ်လီၤ. ဖဲစီၤစီလူးလဲၤတၢ်ဘူးကတုၤလၢ ဝ့ၢ်ပူၤအခါ တၢ်ကပီၤလီၤဘၣ်အီၤသတူၢ်ကလာ် အဃိအဝဲလီၤဃံၢ်ဝဲလၢ ဟီၣ်ခိၣ်အလိၤလီၤ. ဒီးအဝဲနၢ်ဟူ တၢ်ကလုၢ်တခါတဲဘၣ်အီၤလၢ– ‘စီၤစီလူးဧၢ, ဘၣ်မနုၤအဃိ နမၤအၢမၤသီယၤလဲၣ်.’ စီၤစီလူးသံကွၢ်ဝဲလၢ– ‘နမ့ၢ်မတၤတဂၤလဲၣ်.’ တၢ်စံးဆၢက့ၤအီၤလၢ– ‘ယမ့ၢ်ယ့ၣ်ၡူးလီၤ. လဲၤနုာ်လီၤလၢ ဝ့ၢ်ဒၤမ့ၤစ့းအပူၤ ဒီးနကဘၣ်မၤတၢ် မနုၤလဲၣ်န့ၣ် နကသ့ၣ်ညါဘၣ်လီၤ.’ ဝံၤဒီး စီၤစီလူးအမဲာ်ချံ တထံၣ်တၢ်လၢၤဘၣ်. လၢတၢ်န့ၣ်အဃိ ပှၤဘၣ်လဲၤဆှၢအီၤဆူဝ့ၢ်ပူၤလီၤ.
လၢဝ့ၢ်ဒၤမ့ၤစ့းအပူၤန့ၣ် ပှၤခရံာ်ဖိလၢအတီအလိၤအိၣ်ဝဲတဂၤ, အမံၤမ့ၢ်ဝဲစီၤအနၤနံလီၤ. ယ့ၣ်ၡူးတဲဘၣ်အီၤလၢ– ‘လဲၤလၢကျဲတဘိလၢ ဘၣ်တၢ်ကိးအီၤလၢ တၢ်ဘျၢ ဒီးဃုကွၢ်စီၤယူဒၤအဟံၣ် ဒီးနကထံၣ်န့ၢ်စီၤစီလူးန့ၣ်လီၤ.’ ဒီးစီၤအနၤနံတဲဝဲလၢ– ‘ကစၢ်ဧၢ, ပိာ်ခွါတဂၤအံၤအဂ့ၢ်အကျိၤန့ၣ် ယနၢ်ဟူဘၣ်ဒီဒူၣ်လံ. အဝဲဟးဖီၣ်ဝဲနပျဲၢ်နဘီၣ် ဒီးပၢနုာ်ဝဲလၢဃိာ်ပူၤလီၤ.’ ဘၣ်ဆၣ် ယ့ၣ်ၡူးတဲဝဲလၢ– ‘လဲၤဆူအအိၣ်, ယဃုထၢထီၣ်အီၤလၢ ကစံၣ်တဲၤတဲလီၤတၢ်သးခုကစီၣ်လၢ ထံကီၢ်အါဘ့ၣ်အပူၤလီၤ.’
လၢတၢ်န့ၣ်အဃိ စီၤအနၤနံလဲၤထံၣ်လိာ်အသးဒီးစီၤစီလူး ဒီးတဲဘၣ်အီၤလၢ– ‘ယဒီပုၢ်ဝဲၢ်စီၤစီလူးဧၢ, ယ့ၣ်ၡူးဆှၢလီၤယၤ ဒ်သိးကမၤဘျါက့ၤ နမဲာ်ချံအဂီၢ်လီၤ.’ တဘျီဃီန့ၣ် စီၤစီလူးအမဲာ်ချံထံၣ်က့ၤတၢ်လီၤ. စီၤစီလူးမၤလိ ယ့ၣ်ၡူးအဂ့ၢ်ဒီးကဲထီၣ်ဝဲ ယ့ၣ်ၡူးအပျဲၢ်အဘီၣ်တဂၤလီၤ. အဝဲဒိးဘျၢအသးလၢထံဒီးကဲထီၣ်ခရံာ်ဖိတဂၤလီၤ. စီၤစီလူးစးထီၣ် စံၣ်တဲၤတဲလီၤတၢ်လၢ ဘူၣ်ဘျီၣ်တဖၣ်အပူၤ ဃုာ်ဒီးအဒီပုၢ်ဝဲၢ်ခရံာ်ဖိတဖၣ်လီၤ. ဖဲစီၤစီလူးသိၣ်လိပှၤဂၤ ဘၣ်ဃးဒီးယ့ၣ်ၡူးအဂ့ၢ်အခါ ပှၤယူဒၤဖိတဖၣ် ကမၢကမၣ်ဝဲဖးဒိၣ်ညါ. အဝဲသ့ၣ်တဲဝဲလၢ–
‘ပှၤတဂၤအံၤ မ့ၢ်ပှၤလၢအမၤအၢမၤသီ ယ့ၣ်ၡူးအပျဲၢ်အဘီၣ်တဖၣ် တမ့ၢ်ဧီၤ.’လၢသၢနံၣ်အတီၢ်ပူၤန့ၣ် စီၤစီလူးစံၣ်တဲၤတဲလီၤတၢ်လၢ ပှၤအိၣ်လၢဝ့ၢ်ဒၤမ့ၤစ့းအပူၤလီၤ. ပှၤယူဒၤဖိတဖၣ်သးဟ့စီၤစီလူး ဒီးကူၣ်ထီၣ်ဝဲလၢကမၤသံအီၤလီၤ. ဘၣ်ဆၣ် ဒီပုၢ်ဝဲၢ်တဖၣ်သ့ၣ်ညါဝဲ ပှၤယူဒၤဖိ အတၢ်ကူၣ်အဃိ မၤစၢၤဝဲစီၤစီလူးလၢ ကဃ့ၢ်ပူၤဖျဲးအသးလီၤ. အဝဲသ့ၣ်ပာ်လီၤ စီၤစီလူးလၢ ကုတဖျၢၣ်အပူၤဒီး စဲၤလီၤအီၤလၢဝ့ၢ်ခိၣ်ဒူလီၤ.
ဖဲစီၤစီလူး က့ၤဝဲဆူဝ့ၢ်ယရူၤၡလ့ၣ်အခါ အဝဲဂုာ်ကျဲးစၢးမၤသကိးတၢ်ဒီး ဒီပုၢ်ဝဲၢ်လၢအအိၣ်ဖဲန့ၣ်တဖၣ်လီၤ. ဘၣ်ဆၣ် ဒီပုၢ်ဝဲၢ်လၢဝ့ၢ်ယရူၤၡလ့ၣ်အပူၤန့ၣ် ပျံၤဝဲစီၤစီလူးလီၤ. လၢခံ ယ့ၣ်ၡူးအပျဲၢ်အဘီၣ်လၢ အသးဂ့ၤတဂၤ အမံၤလၢစီၤဘၢ်နါဘၤန့ၣ် လဲၤကိးဝဲစီၤစီလူးဆူ တၢ်မၢဖိတဖၣ်အအိၣ် ဒီးတဲဘၣ်အဝဲသ့ၣ်လၢ စီၤစီလူးဆီကလဲအတၢ်အိၣ်မူလံ. စီၤစီလူးစံၣ်တဲၤတဲလီၤ တၢ်သးခုကစီၣ်လၢ တၢ်သူၣ်ဆူၣ်သးဆူၣ်အပူၤ ဃုာ်ဒီးဒီပုၢ်ဝဲၢ်လၢ ဝ့ၢ်ယရူၤၡလ့ၣ်အပူၤလီၤ. လၢခံန့ၣ် ပှၤကိးစီၤစီလူးအမံၤလၢ စီၤပီလူးလီၤ.
“ယ့ၣ်ၡူးခရံာ်ဟဲလီၤလၢဟီၣ်ခိၣ်ချၢ, ဒ်သိးအကအုၣ်က့ၤခီၣ်က့ၤ ပှၤတၢ်ဒဲးဘးဖိ, လၢယမ့ၢ်အဒိၣ်ကတၢၢ်တဂၤလီၤ.”—၁ တံၤမသ့း ၁:၁၅