Saulu mwisi Roma kakala, wawutukila kuna mbanza Taso. Mfarisi kakala ona watoma longwa e Nsiku mia Ayuda. Kazolanga Akristu ko. Wavaikisanga Akristu muna nzo zau yo kubasia muna pelezo. Vava buka kia yimpumbulu bavonda Setefano muna matadi, Saulu mpe i vana kakala.

Kansi, Saulu kayangalala ko wau vo Akristu kaka ana bakala muna Yerusaleme kasianga mu pelezo. Walomba kwa ngang’ambuta vo kamfila kuna mbanza Damaseke kimana kenda vavi Akristu. Vava Saulu kalwaka lukufi ye mbanza, ntemo wantemena kuna kinsalukisa yo bwa vana ntoto. Wawá ndinga yavova vo: ‘E Saulu, ekuma okumbangikilanga?’ Saulu wayuvula vo: ‘Ongeye u nani?’ E ndinga yavutula vo: ‘Mono i Yesu. Wenda kuna Damaseke, i bosi ozaya dina ofwete vanga.’ Vana vau, Saulu wakituka se mpofo. Diavava vo kasimbwa muna koko yamuna mbanza.

Muna Damaseke, mwakala yo Nkristu mosi e nkumbu andi Anania. Yesu wamvovesa muna mona-meso vo: ‘Wenda kuna nzo a Yuda muna nzila iyikilwanga vo Singama yo vava Saulu.’ Anania wavova vo: ‘E mfumu nzeye mawonso mu kuma kia muntu ndioyo. E salu kiandi i sia alongoki aku mu pelezo.’ Kansi, Yesu wamvovesa vo: ‘Wenda kwa yandi. Nsolele Saulu kimana kasamuna e nsangu zambote mu zula yayingi.’

Muna kuma kiaki, Anania wasolola Saulu yo kumvovesa vo: ‘E Saulu wa mpangi ame, Yesu untumini yatemona meso maku.’ Vana vau, Saulu oyantikidi mona diaka. Walongoka oma ma Yesu yo kituka nlandi andi. Wau kavubwa nze Nkristu, Saulu wayantika sila umbangi muna masambilu, kumosi ye mpangi zandi Akristu. Nga  olenda yindula una Ayuda bamona vava bamona Saulu kalonganga wantu mu kuma kia Yesu? Bavova vo: ‘Nga ke yandi ko ndioyo wabangikidinge alongoki a Yesu?’

Mu kolo kia mvu ntatu, Saulu wasila umbangi kwa wantu bazingilanga muna mbanza Damaseke. Ayuda bayantika menga Saulu yo vava nkutu kumvonda. Kansi, vava ampangi bawá e diambu diadi, bansadisa kimana katina. Bansia muna kitunga yo kumvaikisila vana vundu diakala muna yaka kia mbanza.

Vava Saulu kayenda kuna Yerusaleme, wavava yikama ampangi ana bazingilanga mu mbanza yayi. Kansi, wonga wa Saulu bakala wau. I bosi, nlongoki mosi wakala ye nkumbu a Banaba wanata Saulu vana vakala antumwa yo kubakwikidisa vo Saulu wasoba kikilu. Saulu wayantika samuna e nsangu zambote yo vema kwawonso kumosi ye nkutakani muna Yerusaleme. Kuna kwalanda, wazayakana muna nkumbu a Paulu.