Saule neli Muroma yanaapepezwi mwa Tarese. Neli Mufalisi ili caziba wa Mulao wa Sijuda, mi naatoile Bakreste. Naazwisize fande baana ni basali bane bali Bakreste mwa mandu abona ni kubakenya mwa tolongo. Naayemi kwatuko inze abuha ñumbili ya batu bane bahalifile inze babulaya mulutiwa Setefani ka kumupobaula ka macwe.

Kono Saule naasika tama feela Bakreste mwa Jerusalema. Naakupile baprisita babahulu kuli bamulume kuya kwa tolopo ya Damaseka kuli ayo bata Bakreste kwateñi. Cwale Saule hanaali bukaufi ni tolopo yeo, liseli lelituna lamubenyeza, mi awela fafasi. Autwa linzwi lene lili: ‘Saule, ki kabakalañi hau ninyandisa?’ Saule abuza, ali: ‘Ki wena mañi?’ Linzwi kihaa lili: ‘Ki na Jesu. Uye mwa Damaseka, ukatalusezwa zeulukela kueza.’ Honafo feela, Saule aba sibofu, mi naatokwa kuswaliwa kwa lizoho kuli aye mwa tolopo.

Mwa Damaseka, nekunani Mukreste yasepahala yabizwa Ananiasi. Jesu amubulelela mwa pono kuli: ‘Zamaya mwa nzila yebizwa Nzila Yenamile kwa ndu ya Judasi, uyo bata Saule.’ Ananiasi kihaa li: ‘Mulena, naziba lika kaufela ka za muuna yale! Usweli kukenya balutiwa mwa tolongo!’ Kono Jesu ali ku yena: ‘Zamaya ku yena. Niketile Saule kuli akutaze taba yende kwa batu babañata.’

Kacwalo, Ananiasi afumana Saule mi ali ku yena: ‘Saule, muzwale, Jesu unilumile kuli nito kwahulula meeto ahao.’ Honafo feela, Saule akalisa kubona hape. Aituta ka za Jesu mi aba mulateleli wahae. Hasaabile Mukreste yakolobelizwe, Saule akala kukutaza mwa masinagoge, hamohocwalo ni Bakreste babañwi. Munahane feela mone bakomokezi Majuda hane baboni Saule inze akutaza ka za Jesu! Kihaa bali: ‘Kana  yo haki yena muuna yanaanyandisize balutiwa ba Jesu?’

Ka lilimo zetaalu, Saule naakutalize kwa batu bane bapila mwa Damaseka. Majuda nebatoile Saule mi babata kumubulaya. Kono mizwale baziba milelo yabona mi bamutusa kubaleha. Bamubeya mwa sizuma mi kihona bamushetumukiseza mwa lisuba la mwa limota.

Saule hanaaile kwa Jerusalema, alika kuswalisana ni mizwale. Kono neba musaba. Cwale mulutiwa yasishemo yabizwa Barnabasi aisa Saule kwa baapositola ni kubakolwisa kuli naacincize luli. Saule akala kukutaza taba yende ka kutukufalelwa hamoho ni puteho ya mwa Jerusalema. Hasamulaho, akala kuzibahala ka libizo la Paulusi.