Saulo ne en Ja-Rumi ma ne onyuol Tarso. Ne en Ja-Farisai ma ne olony e Chike Jo-Yahudi, kendo nochayo Jokristo ahinya. Nogologa Jokristo e utegi kendo terogi e jela. E kinde ma ne inego Stefano gi kite, Saulo be ne ni kanyo, kendo noyie gi nekne.

Saulo ne neno ni mako Jokristo ma ne ni Jerusalem kende ne ok oromo. Ne okwayo jadolo maduong’ mondo oyiene odhi odwar Jokristo mamoko ma ne ni e taon mar Damaski. Ka ne Saulo chiegni chopo e taondno, ler moro marieny mager ne omenye apoya, kendo ne ogore piny. Kae to ne owinjo dwol moro ka wacho kama: “Saulo, isanda nang’o?” Saulo nopenjo niya: “In ng’a?” Dwolno ne odwoke niya: ‘An Yesu. Donj e taon mar Damaski. Ibiro ng’eyo gima onego itim.’ Ka Saulo nowinjo wechego, gikanyono wengene ne ok nyal neno, kendo koro ne nyaka ng’ato taye e ka odonj Damaski.

E taon mar Damaski ne nitiere Jakristo moro ma nyinge Anania. Yesu ne onyise e fweny kama: ‘Dhi e od Judas modak e bath ndara mong’ere kaka Ndara Matir mondo imany ng’ato kanyo ma nyinge Saulo.’ Anania nowacho niya: ‘Ruoth, ang’eyo ng’at miwachonano maber, wachne rach! Osetero jopuonjreni mang’eny e jela.’ Yesu ne odwoke niya: ‘In dhi adhiya ire. Aseyiere mondo oyal wach maber ne ji moa e ogendni mopogore opogore.’

Anania ne odhi moyudo Saulo, monyise niya: ‘Saulo owadwa, Yesu oora mondo abi ayaw wang’i.’ Sano-sano, wenge Saulo nochako neno. Saulo ne opuonjore weche Yesu, kendo ne obedo jalupne. Ne otise, mi ochako lando wach maber e sunagogi ka en gi Jokristo wetene. Parie kaka wachno ne omako dho Jo-Yahudi sama ne gineno ka Saulo puonjo ji wach Yesu! Ne gipenjore e  kindgi niya: ‘Donge mae e ng’at ma ne sando jopuonjre Yesu?’

Kuom higni adek, Saulo ne olando wach maber e taon mar Damaski. Jo-Yahudi ne ok dwar Saulo, kendo ne gipango nege. To ka ne owete ofwenyo wachno, ne gikonyo Saulo pondo. Ne gikete e okapu, kae to gilore mos nyaka piny kokalo kuom otuchi moro ma ne ni e kor ohinga.

Ka ne Saulo odhi Jerusalem, ne otemo riwore gi owete ma ne ni kuno. Kata kamano, ne giluore. Kae to japuonjre moro ma nyinge ne Barnaba nokawo Saulo modhigo ir joote konyisogi ni Saulo ne oselokore gadier. Saulo ne ochako yalo wach maber gi kinda ka en gi owete ma ne ni Jerusalem. Bang’e, ne oluong Saulo ni Paulo.