Jun xjal te Roma te Saulo aju ul itzʼ toj Tarso. Jun aj fariseo ojtzqiʼnxix kyley aj Judiy tuʼn ex in che eltoq tikʼun qe okslal. In che etztoq tiʼn toj kyja, qe xinaq ex qe xuʼj, ex in che okx tqʼoʼn pres. Axpe ikx kyaj weʼ keʼyil tej tkubʼ kybʼyoʼn jun kʼloj xjal Esteban tukʼil abʼj, aʼyeju otoq tzaj nim kyqʼoj.

Noqtzun tuʼnj, nya oʼkx qe okslal te tnam Jerusalén e okx tqʼoʼn Saulo pres. Tuʼntzunju xi tqanin te nejenel te pal tuʼn t-xi tsamaʼn toj tnam Damasco tuʼn kytzaj ttzyuʼn qe okslal atztzun. Tej chʼixtoq tpon Saulo toj tnam, kubʼ qoptzʼaj jun spikʼun tiʼjele, ex kubʼtzun tzʼaq twitz txʼotxʼ. Ex xi tbʼiʼn jun tqʼajqʼajel wibʼaj: «Saulo, ¿tiquʼn in chin el tikʼuna?». Xitzun tqanin Saulo te: «¿Alkyetzuna?». Xi ttzaqʼweʼn tqʼajqʼajel wibʼaj te: «Aʼyine Jesús. T-xiʼya toj tnam Damasco, ex atztzun ktzajel qʼamaʼn teya tiʼ kbʼantel tuʼna». Toj ambʼil aju, kyaj Saulo te moẍ ex xi tzyuʼn tqʼabʼ tuʼn tpon toj tnam.

Toj Damasco attoq jun tbʼanel okslal Ananías tbʼi. Xi tqʼamaʼn Jesús te toj jun witzikʼ: «T-xiʼya toj tja Judas, toj kay tok tbʼi Jiqun tiʼj ex jyoma Saulo». Xi ttzaqʼweʼn Ananías: «Tat, o nbʼiye nim tiʼchaq tiʼj xjal lu. In che okx tqʼoʼn qe t-xnaqʼtzbʼena pres». Xitzun tqʼamaʼn Jesús te: «T-xiʼya jatumel taʼ, tuʼnju ma jaw nskʼoʼne Saulo tuʼn tpakbʼan tbʼanel tqanil toj nimku tnam».

Tuʼntzunju xiʼ Ananías jatumel taʼ Saulo ex xi tqʼamaʼn te: «Erman Saulo, ma chin tzaj samaʼne tuʼn Jesús tuʼn tjaqet twitza». Jaqettzun twitz Saulo juntl maj. El tnikʼ tiʼj nimku tiʼchaq tiʼj Jesús ex ok lepeʼ tiʼj. Jaw aʼ twiʼ ex xi tzyet tuʼn tpakbʼan kyoj ja te nabʼil Dios kyukʼil okslal. ¿Jakupe kubʼ t-ximana tiʼ kubʼ kynaʼn aj Judiy? Jaʼlo in noktoq  kykeʼyin Saulo in xi t-xnaqʼtzaʼn qe xjal tiʼj Jesús. In kubʼtoq kyxjelin qe xjal judiy jlu: «¿Nyapetzulo ax xjal lu in nel ikʼunte qe t-xnaqʼtzbʼen Jesús?».

Pakbʼan Saulo kye xjal toj oxe abʼqʼi toj tnam Damasco. In neltoq ikʼun kyuʼn aj Judiy ex kubʼ kyximen tuʼn tkubʼ kybʼyoʼn. Noqtzun tuʼnj, ok kybʼiʼn erman jlu ex e onin tiʼj tuʼn tklet. Kutz kyiʼn toj jun chiʼl twiʼ muro te tnam.

Tej t-xiʼ Saulo toj Jerusalén, kubʼ t-ximen tuʼn t-xiʼ keʼyil qe erman. Noqtzun tuʼnj, in che xobʼtoq te Saulo. Tuʼntzunju, at jun tbʼanel t-xnaqʼtzbʼen Jesús aju Bernabé tbʼi xi tiʼn Saulo tuʼn tpon kyukʼil apóstol ex xi tqʼamaʼn kye qa ax tok otoq chʼexpaj Saulo. Ok tchmon tibʼ Saulo kyukʼil okslal te Jerusalén ex ok ten pakbʼal tukʼil tzalajbʼil tiʼj tbʼanel tqanil. Tej tbʼet ambʼil, ok kyqʼoʼn xjal tbʼi te Pablo.