Saulo jam myaxuˈunkˈäjty Tarso. Yëˈë tuˈugë farisee diˈib wäˈäts tnijawë ja ley diˈib myëdäjttëbë judiyëtëjk ets yˈaxëkˈijx pënaty pyanëjkxtë Kristë. Tëjkmdëjkm ijty dyajpëtsëmyë yetyëjk toxytyëjk, tpawitsy tpajëdoty ets ttsumy. Axtë jeˈeyë tˈijxy ko tuk grupë jäˈäyëty tkukäˈtstë Esteban, diˈibë Jesus yˈëxpëjkpëˈäjt.

Perë Saulo kyaj kyonformaräjty ko jeˈeyë yajtsumdët ja Dios mëduumbëty Jerusalén. Pääty ojts tˈanëëmë ja saserdotë wintsën ets kyaxëdët Damasco parë nanduˈun nëjkx tˈaxëktuny pënaty pyanëjkxtëbë Kristë. Ko netyë Saulo tyimjäˈtanë Damasco, ta tˈijxy tuˈugë mëk jäjjën diˈibë tsoˈomp tsäjpotm nyajäjˈawdityëty, ets ta kyëdääy. Ta net tmëdooy tuˈugë ayuk: “Saulo, ¿tikots xypyajëdity?”. Saulo ta dyajtëëy: “¿Mbën mijts?”. Ta yaˈˈatsooy: “Ëjtsëts Jesus. Nëjkx Damasco, ets jam myaˈˈanëmëyaˈany ti mbäät xytyuny”. Jantsy jeˈeyë duˈun yaˈˈamääytyaay, ta Saulo ojts wyiintsë, witsy ojts yajwoownëjkxnë Damasco.

Jam Damasco tamë nety tuˈugë Dios mëduumbë diˈib xyëwˈäjtypy Ananías. Jesus ta yˈanmääyë: “Nëjkx mä tyëjkë Judas, mä tuˈu diˈibë xyëwˈäjtypy Tëytyuˈu ets jam xyˈëxtäˈäyëdë Saulo”. Ananías ta yˈatsooy: “Wintsën, tëts tijaty nmëdoyˈaty mä tadë yetyëjk. Tsyuumy myajtsypyë mˈëxpëjkpëty”. Perë Jesus ta yˈanmääyë: “Nëjkx, jaˈa ko tëts nwinˈixyë Saulo parë tkäjpxwäˈkxëdë Diosë yˈayuk mä kanäägë it lugäär”.

Ta Ananías ojts tninëjkxyë Saulo ets tˈanmääy: “Mëguˈuk Saulo, yëˈëts xykyajxpë Jesus parë mˈijxpëkët jatëgok”. Ta netyë ja Saulo yˈijxpëjky. Ta tnijäˈäwë tijatyë Jesus tukniˈˈijxë ets ta ojts tpanëjkxy. Ta nyëbejty ets tyëjkë ëwäˈkx käjpxwäˈkxpë mäjatyë sinagoogë mët ja myëguˈuktëjk. ¿Mbawinmaapy wiˈix ja judiyëtëjk myonyˈijx myonyjäˈäwëdë? Yˈijxtë  wiˈixë Saulo tjantsy nyimaytyaˈagyë Jesus. Ta ja judiyëtëjk nyayajtëëwëdë: “¿Tii kyaj yëˈëjëty diˈib pyajëdijt ja Jesusë yˈëxpëjkpëty?”.

Tëgëk jëmëjtë Saulo ojts kyäjpxwaˈkxy Damasco. Axëkˈijxëdë ja judiyëtëjk ets tyukniwinmäˈäyëdë parë dyaˈoogäˈändë. Per ta tnijäˈäwëdë ja myëguˈuktëjk ets ta tpudëjkëdë parë kyaˈagët. Ta yajkutëëynyajxy katsyoty mä nety waanë nyawäˈätsëty ja käjpn.

Ko Saulo jyajty Jerusalén, ta ojts tjakuˈixëyaˈany ja myëguˈuktëjk, per yajtsëˈkë. Pääty niduˈugë Jesusë yˈëxpëjkpë diˈib jantsy oyjyaˈay diˈib xyëwˈäjt Bernabé ojts twoonëjkxyë Saulo mä ja apostëlëty ets ttukmëtmaytyaktë ko Saulo të tyëgäjtsnë. Saulo ta tyuˈukmujky mët ja myëguˈuktëjk diˈib Jerusalén ets tyëjkë käjpxwäˈkxpë xondaˈakyˈääw xondaˈakyjyot. Ko tiempë nyajxy, ta ojts yajtijnë Pablo.