Saulo wali umwina Loma uwavyalilwe mu Tasi. Wali Umufaliseo uwamanyile sana Amasunde ya Yayuda nupya wapasile Aina Klistu. Wafumyanga Aina Klistu aonsi na anaci mu mang’anda yao kwene nu kuyatwala umu cifungo. Nupya nawe kwene wimilile ala akulola nako kuno iumba ilya yantu aipe lyatamanga umusambi wizina lyakuti sitivini na mawe mpaka afwa.

Nupya Saulo atalondanga ukupelela sile pa kucuzya Aina Klistu aa mu Yelusalemu. Wanenyile simapepo mukalamba ukuti amuzumilizye ukuya uku Damasika pakuti akaacuzya Aina Klistu. Lino Saulo wapalamile umupiipi nu musumba, mukupumikizya luswepo lwamukozizye nupya waponyile pansi. Lyene uvwile izwi likuti: ‘Saulo, U mulandu ci uno ukuncuzizya?’ Saulo uzizye ati: ‘Wewe weni?’ Uvwile izwi likuti: ‘Nene Yesu. Yanga uku Damasika nupya kuuku akuno umaya ukamanye vino ulinzile ukucita.’ Papo kwene sile, Saulo wapafwile nupya yamulemile sile api kasa nu kumutwala umu musumba.

Mu Damasika mwali Umwina Klistu umwi uwa cumi uwi zina lyakuti Ananiya. Yesu wanenyile Ananiya umu cilolwa ati: ‘Yanga uku ng’anda yakwe Yuda mu museo ukaamwa ukuti Uwololoke, uye ukalonde Saulo.’ Ananiya watiile: ‘Mwene, namanya vyonsi pa monsi wiya. Akalema asambi yako nu kuika umu cifungo.’ Lelo Yesu wamunenyile ati: ‘Yanga kuli Saulo pano natimusoolola ukuti akasimikile ilyasi lisuma uku yantu aa mu nko izingi.’

Fwandi lino Ananiya wazanyile Saulo wamunenyile ati: ‘Saulo mwinane, Yesu watantuma ukuti nize njule amanso yako.’ Papo kwene sile Saulo watandike ukulola nupya. Wasambilile pali Yesu nupya wizile aya mulondezi wakwe. Lyene Saulo wizile aya Umwina Klistu  umubatiziwe, nupya watandike ukusimikila umu masunagogi pamwi na Ina Klistu yauze. Ayuda yazungwike lino yaweni Saulo akusambilizya antu pali Yesu. Yalanzile iyati: ‘Uzye wii asi umonsi uwacuzyanga asambi yakwe Yesu?’

Pa myaka itatu, Saulo wasimikile uku yantu aa mu Damasika. Ayuda yapasile Saulo nupya yapangine ukuti yamukome. Lelo lino Aina Klistu yauze yamanyile vino Ayuda yapanganga ukucita, yamwazwilizye ukuutuka. Yamwisile muli basiketi nu kumufumizya pa cipongo icali pi linga lya musumba.

Lino Saulo waile uku Yelusalemu, wezizye ukuya pamwi na Ina Klistu yauze. Nomba yamutiinanga. Lelo umusambi umwi uwali ni cikuku uwi zina lyakuti Banaba watwazile Saulo uku yatumwa nu kuyalondolwela ukuti Saulo wasenuka umu cumi. Saulo watandike ukusimikila sana ilyasi lisuma pamwi na aa mu cilongano ca mu Yelusalemu. Pa cisila wizile amanyikwa ukuti a Paulo.