A Soll roga Tars. Dẽnd a ra yaa Rom tẽngã neda. La a ra yaa Fariziẽ me, n mi zʋɩf-rãmbã tõogã sõma. A ra kisa kiris-nebã, n kẽed b zagsẽ wã n yõgd rap la pagb n ningd bãens-roogo. A pʋd n sakame tɩ neb sũy sẽn da yik lob a Etɩɛn kug n kʋ, t’a yas n getẽ.

La a Soll sẽn da yõgd Zerizalɛm kiris-nebã n kẽesd bãens-roogã ra pa sek-a ye. A kosa maan-kʋʋdb kãsmã sore, n na n kẽng Damaas n tɩ gẽes kiris-neb nins sẽn be be wã. A Soll sẽn wa n kolg tẽngã, zĩig pʋgẽ vẽenem n yi yĩngr n bui-a. A wʋma ned koɛɛg sẽn yeel tɩ: ‘Soll, bõe yĩng tɩ fo namsd maam?’ La a Soll sokame yaa: ‘Fo yaa ãnda?’ Tɩ koɛɛgã leok tɩ: ‘Mam yaa a Zeezi. Kẽng Damaase, tɩ f na n bãnga bũmb ning fo sẽn tog n maanã.’ Wakat kãng bala, a Soll lebga zoanga, tɩ b gãd a nugã n tɛ n kẽng tẽngã pʋga.

Damaas tẽngã pʋga, wẽn-sakd a ye n da be be, t’a yʋʋr boond t’a Ananiase. Vẽnegr pʋgẽ, a Zeezi yeel-a lame yaa: ‘Yik n kẽng sor ning sẽn boond tɩ Tɩrgã, a Zida zakẽ wã, n tɩ ges a Solle.’ La a Ananias yeelame: ‘Zu-soaba, mam mii bũmb ning fãa rao-kãngã sẽn maanã. A kẽesa fo karen-biisã bãens-roogo.’ La a Zeezi yeel-a lame yaa: ‘Yik n kẽnge. Bala, m yãka a Soll t’a na n tɩ moon koe-noogã tẽns wʋsg pʋsẽ.’

Dẽ, a Ananias tɩ yãa a Solle, n yeel-a yaa: ‘M saam-biig a Solle, a Zeezi tʋma maam tɩ m wa puk f ninã.’ Zĩig pʋgẽ, a Soll ninã pukame. A zãmsa bũmb wʋsg a Zeezi zugu, n lebg a karen-biiga. A sẽn deeg koom lisg n lebg kiris-nedã, a sɩngame n naagd kiris-neb  a taabã n moond koɛɛgã zʋɩf-rãmbã karen-dotẽ. Zʋɩf-rãmbã sẽn yã a Soll t’a gomd a Zeezi yell ne nebã, fo pa tagsd tɩ ling-b lame sɩda? B yeelame: ‘Pa rao-kãngã la sẽn da namsd a Zeezi karen-biisã la?’

A Soll paa Damaas yʋʋm a tã, n moon koɛɛgã. La zʋɩf-rãmbã ra kis-a lame, n baood n na n kʋ-a. La saam-biisã bãngame, n sõng-a t’a zoe n põse. B kẽes-a-la peoog pʋgẽ, n tũ roog fenetrẽ n sik-a tẽngã lalg poore.

A Soll sẽn leb Zerizalɛmmã, a baoome n na n naag saam-biisã, la b ra zoet-a lame. Dẽ, karen-biig a ye sẽn boond t’a Barnabas talla a Soll n kẽng tʋm-tʋmdbã nengẽ, n sõng-b tɩ b bãng t’a Soll sɩd toeemame. A Soll naaga Zerizalɛm tigingã neba, n moon koe-noogã ne yẽesem. B wa n boond-a lame t’a Poll.