LEZZJONI 96
Ġesù jagħżel lil Sawl
Sawl kien Ruman, li twieled f’Tarsu. Hu kien Fariżew li kien jaf sew il-Liġi Lhudija, u kien jobgħod lill-Kristjani. Hu kien jaqbad u jidħol fid-djar tal-Kristjani, ikaxkarhom ’il barra, u jitfagħhom il-ħabs. Sawl darba anki qagħad iħares hekk kif nies irrabjati qatlu lid-dixxiplu Stiefnu billi tefgħulu l-ġebel.
Sawl ma kienx kuntent li jarresta lill-Kristjani f’Ġerusalemm biss. Hu talab lill-qassis il-kbir biex jibagħtu fil-belt taʼDamasku ħalli joqtol lill-Kristjani t’hemm. Imma xħin Sawl qorob lejn il-belt, deher dawl qawwi madwaru, u waqaʼ mal-art. Imbagħad semaʼ leħen jgħidlu: ‘Sawl, għala qed tippersegwitani?’ Sawl staqsa: ‘Min int?’ It-tweġiba kienet: ‘Jien Ġesù. Mur Damasku, u hemm se titgħallem x’għandek tagħmel.’ F’dak il-ħin stess, Sawl ma baqax jara, u kellhom imexxuh sal-belt minn idejh.
F’Damasku, kien hemm Kristjan leali jismu Ananija. Ġesù qallu f’viżjoni: ‘Mur fid-dar taʼ Ġuda fit-triq li tissejjaħ id-Dritta, u sib lil Sawl.’ Ananija wieġeb: ‘Mulej, jien smajt x’inhu jagħmel dan ir-raġel! Hu qed jitfaʼ lid-dixxipli tiegħek fil-ħabs!’ Imma Ġesù qallu: ‘Mur għandu. Jien għażilt lil Sawl biex jipprietka l-aħbar tajba f’ħafna pajjiżi.’
Għalhekk, Ananija mar għand Sawl u qallu: ‘Sawl, ħija, Ġesù bagħatni għandek biex niftaħlek għajnejk.’ F’dak il-ħin, Sawl reġaʼ beda jara. Hu tgħallem fuq Ġesù u sar dixxiplu tiegħu. Issa li Sawl tgħammed bħala Kristjan, beda jipprietka fis-sinagogi maʼ ħutu l-Kristjani. Tistaʼ timmaġina kif baqgħu mistagħġbin il-Lhud xħin raw lil Sawl jgħallem lin-nies dwar
Ġesù? Huma qalu: ‘Dan mhux l-istess raġel li kien joqtol lid-dixxipli taʼ Ġesù?’Għal tliet snin, Sawl ipprietka f’Damasku. Il-Lhud kienu jobogħdu lil Sawl u ppjanaw biex joqtluh. Imma l-aħwa saru jafu b’dak li kienu se jagħmlulu u għenuh jaħrab. Huma poġġewh f’qoffa u niżżluh minn tieqa li kienet mas-sur tal-belt.
Xħin Sawl wasal Ġerusalemm, hu pprova jkun mal-aħwa t’hemmhekk. Imma huma bdew jibżgħu minnu. Imbagħad, dixxiplu jismu Barnaba, b’qalb tajba ħadu għand l-appostli u kkonvinċiehom li Sawl veru kien inbidel. Sawl beda jipprietka b’żelu mal-kongregazzjoni f’Ġerusalemm. Iktar tard, hu sar magħruf bħala Pawlu.
“Kristu Ġesù ġie fid-dinja biex isalva lill-midinbin, li fosthom jien l-iktar li nispikka.”—1 Timotju 1:15