Saulo eliyaya romano uan tlakajtoya ne Tarso. Eliyaya se fariseo katli kuali kiixmatiyaya judíos inintlanauatiljuaj uan kinkualankaitayaya Cristo itokilijkauaj. Kinkixtiyaya tlen ininchaj, tlakamej uan siuamej, uan kintsakuayaya. Se tonali san kiitak kenijkatsa kimiktijkej ika tetl se Cristo itokilijka katli motokaxtiyaya Esteban.

Saulo amo san kintsajki Cristo itokilijkauaj katli itstoyaj Jerusalén. Nojkia kiiljuik nopa sumo sacerdote ma kititlani Damasco uan nojkia kintlatsakuiltiskia katli nopaya itstoyaj. Kema Saulo asitiauiyaya Damasco, se tlauili kitlauilik, uan uetski tlalchi. Uajka se akajya kiiljuik: “Saulo, ¿kenke tinechtlaijiyouiltia?”. Saulo kitlajtlanik: “¿Ajkia ta, noTeko?”. Uan kinankilik: “Na niJesús. Xia Damasco, uan nopaya mitsiljuisej tlake moneki tijchiuas”. Uan ipan nopa tonali Saulo ayokmo tlachixki, uan kimatilantiajkej ne Damasco.

Ipan Damasco itstoya se Cristo itokilijka katli motokaxtiyaya Ananías. Kejuak ipan se temiktli Jesús kiiljuik: “Xia Judas ichaj, ipan nopa ojtli tlen itoka Recta, uan xijtemoti Saulo”. Ananías kinankilik: “NoTeko, nijkaktok san tlemach kichiua nopa tlakatl. Kintsakua motokilijkauaj”. Uan Jesús kiiljuik: “Xikitati, pampa nijtlapejpenijtok ma tlajtolmoyaua ipan miak altepemej”.

Uajka Ananías kiitato Saulo uan kiiljuik: “Saulo, noikni, Jesús nechnauatik ma nijchiua sampa xitlachia”. Uan Saulo nimantsi uelki tlachia. Kimachtijkej tlen Jesús uan mochijki itokilijka. Moatsonpoliuiltik uan pejki tlajtolmoyaua ipan sinagogas ininuaya sekinok Cristo itokilijkauaj. ¿Kenijkatsa kiitakej nopa judíos? Nama Saulo kinmachtiyaya sekinok maseualmej tlen Jesús. Nopa judíos  motlajtlaniyayaj: “¿Ni tlakatl eli katli kintlatsakuiltiyaya Jesús itokilijkauaj?”.

Saulo tlajtolmoyajki eyi xiuitl ipan Damasco. Nopa judíos kikualankaitayayaj uan moiljuijtoyaj kimiktisej. Uan kema toikniuaj kimatkej, kipaleuijkej ma mochololti. Kikixtijkej kampa koyontoya nopa tepamitl uan kitemouijkej ipan se kuachikiuitl.

Kema Saulo yajki Jerusalén kinekiyaya kinitati toikniuaj uan inijuantij kimakasiyayaj. Uajka, Bernabé, se Cristo itokilijka katli kipixtoya tlauel kuali iyolo, kiuikak Saulo kampa itstoyaj nopa apóstoles uan kiniljuik ya moyolpatlatoya. Uajka Saulo pejki mosentilia ininuaya toikniuaj katli itstoyaj Jerusalén uan pejki tlajtolmoyaua ika pakilistli. Teipa kipatilijkej itoka uan kitokaxtijkej Pablo.