Saulo katka se romano akin otlakat Tarso. Yejua katka se fariseo akin kuajli kixmatiya intlanauatiluan judíos. Pampa kintlauelitaya akin kichiuayaj ken Cristo kinuajkixtiaya inchan, kintechiuilanaya niman komintsakuaya. Yejua teuan ompa konitstoya kenon kimiktiayaj Esteban, inomachtijkauj Cristo, ijkuak okitemojmotlakej.

San ika, Saulo xsan kinekiya kintsakuas akin chantiyaj Jerusalén. Yejua okitlajtlanili ueyi teopixketl makititlani ueyikalpan Damasco niman ompa noijki kintlaueltokas akin kichiuaj ken Cristo. Ijkuak Saulo iajsitoya ueyikalpan, se tlauijli okiyeualo niman yejua ouets ipan tlajli. Kuakon okikak se tlajtojli: “Saulo, ¿tleka tinechtlaueltoka?”. Saulo okitlajtolti: “¿Akinon tejua?”. Tlajtojli okijli: “Nejua niJesús. Xuiya Damasco niman tikmatis tlen noneki tikchiuas”. Nimantsin, Saulo okipolo itlachialis niman sa okimatilantiajkej ijkon okaxiltijkej ueyikalpan.

Ipan Damasco nemiya se tlakatl itoka katka Ananías, yejua katka se kuajli inomachtijkauj Cristo. Jesús okinots ipan se tlatlachalistli: “Xuiya ichan Judas ipan se ojtli itoka Melajki, niman xtejtemo Saulo”. Ananías okijto: “¡NoTeko, melak miyek yoniktekakili itech yejon tlakatl! ¡Yejua akin kintsauktika nochi monomachtijkauan!”. San ika, Jesús okijli: “Xuiya itech. Yoniktlapejpeni Saulo ijkon makiteijli kuajli tlajtoltin miyekan ipan tlaltikpaktli”.

Ijkuak Ananías okinexti Saulo, okijli: “Saulo, nokniuj, Jesús yonechajtitlan manikinpajti mixtololojuan”. Nimantsin Saulo oksejpa ouel otlachix. Yejua onomachti itech Jesús niman onochiuj inomachtijkauj. Ijkuak onoapolakti, Saulo opeuj tenojnotsa ipan sinagogas imiuan  oksekimej akin kichiuayaj ken Cristo. ¿Tiknemilia kenon melak otlamojkaitakej judíos ijkuak okitakej ika Saulo tenojnotstinemiya itechkopa Jesús? Judíos kijtouayaj: “¿Xkatka yejuin tlakatl akin kintlaueltokatinemiya inomachtijkauan Jesús?”.

Yeyi xiuitl Saulo otenojnots Damasco. Judíos okitlauelitakej niman okinemilijkej kimiktiskej. San ika, sekimej akin kichiuayaj ken Cristo, okimatkej niman okipaleuijkej macholo. Yejuamej ipan se ueyi chikijtli okontemoltijkej kampa koyonki katka itepan ueyikalpan.

Ijkuak Saulo oyaj Jerusalén, okiyejyeko nosentlalis imiuan akin kichiuayaj ken Cristo. San ika, melak kimakasiyaj. Kuakon Bernabé, se inomachtijkauj Cristo akin yolkuajli katka, okuikak kampa tlatitlankej niman okimijli ika Saulo yemelak yonopatlaka. Saulo opeuj imiuan tenojnotsa ika pakilistli ipan Jerusalén. Sakin yejua okixmatkej ken Pablo.