Saul éí Roman citizen jílı̨́, Társasgi hoʼdizhchı̨́. Jew bibee hazʼáanii yéigo baa ajííłtaʼ áádóó Férisii dah yikahígíí ajítah. Oodlání éí ayóó jijoołá. Hastóí dóó sáanii Oodlání danilínígíí bighandę́ę́ʼ chʼíyiidzı̨́įsgo awáalya ayiinííł ńtʼééʼ. Íhoołʼaahii Stephen tsé bee bił nidzílneʼgo, hoł yáʼátʼéehgo jinéłʼı̨́.

Saul éí Jerúsalemgi Oodlání awáalya ayiiníił ndi doo bił sih da. Damáskas kin haalʼáagi ałdóʼ Oodlání hanishtáa doo, ní. Aláahgo nááʼiiłniihii ákǫ́ǫ́ shidíłʼá yidííniid. Ńtʼééʼ Damáskasjįʼ joogáałgo, tʼáadoo hooyání ayóó átʼéego hakʼi diidláadgo naa ajíígoʼ. Iinééʼ jidiiztsʼą́ąʼgo áháłní: ‘Saul, haʼátʼíí biniinaa atíshíłʼı̨́?ʼ Saul naʼízhdééłkid: ‘Háísh ánítʼı̨́?ʼ Hachʼįʼ haadzíiʼgo ání: ‘Shí éí Jesus áshtʼı̨́. Damáskasgóó díínááł, áadi ádííníłígíí nił bééhodoozįįł.ʼ Tʼóó jineeskʼołígi átʼéego doo ajooʼı̨́į da jizlı̨́ı̨́ʼ. Hálaʼ dajótąʼgo kin dah shijaaʼgóó hoʼdeedlóóz.

Damáskasdi hastiin Ananáíyas wolyéego beʼoodląʼ bidziil. Hoł áhátʼı̨́įgo Jesus hachʼįʼ haadzíiʼgo áháłní: ‘Kʼéhézdon hoolyéedi Júdas bighan, ákǫ́ǫ́ díínáałgo Saul hadíníítaał.ʼ Ananáíyas ájíní: ‘Éí hastiin doo yáʼátʼéehii nilı̨́! Nídahoołʼaahii awáalya ayiinííł.’ Ndi Jesus áháłní: ‘Bichʼįʼ dínááh. Haneʼ yáʼátʼéehii yaa halneʼ doo biniyé Saul nídiiltı̨́.ʼ

Ananáíyas Saul bikʼízhníyáago ábijiní: ‘Saul, shikʼis, ííníʼı̨́ nídíídleeł biniyé Jesus nichʼįʼ shiníłʼaʼ. Tʼáá ákǫ́ǫ́ ajooʼı̨́ níjísdlı̨́ı̨́ʼ. Jesus bínaʼniltin bóhojiiłʼą́ą́ʼ dóó bikééʼ dashdiiyá. Baptize áhoʼdiilyaa áádóó oodlání danilínígíí bił kin biiʼ áłah náʼádleehgi nahojilneʼ. Jerúsalemgi Jesus bínazhʼniłtingo dahoołtsą́ągo Jew dineʼé tʼóó  hakʼee tsídadeesyiz. Ádaaní: ‘Daʼ díísh hastiin Jesus bídahoołʼaahii hainitáago atííłʼı̨́ yę́ę átʼı̨́?ʼ

Damáskasgi nahojilneʼgo tááʼ nááhai. Jew dineʼé tʼáá íiyisíí dahojoołá áádóó dahodiyiilyééł daaníigo nidahaʼá. Ákondi, hakʼis díí nahatʼá bił béédahoozingo, háká ííjééʼ. Kin binaa ahééʼítłʼin bitsésǫʼdę́ę́ʼ basket biiʼ jizdáago adah dahazloʼ.

Saul Jerúsalemgóó jiníyá, éí oodlání bił áłah níjídleeh doo biniyé. Ákondi hwéédaaldzid. Íhoołʼaahii Bárnabas wolyéego bá áhwiinítʼı̨́įgo daalʼaadii yichʼįʼ hoł níʼáázh. Éí Saul kʼad łah átʼéego nitsékees silı̨́ı̨́ʼ níigo há haadzííʼ. Jerúsalemgi Saul éí bízhneedlı̨́įgo nahojilneʼ dóó nazhʼnitingo hahoolzhiizh. Tʼahádóó Paul joosyeʼ.