Saulu ankho ukala ko Roma, mahi watyitilwa ko Tarsu. Ankho omu Faliseu wii nawa Ovitumino vio va Judeu iya ankho uyele Ovakristau. Saulu wamonesile Ovakristau ononkhumbi, tyilinge ovalume ine ovakai, ankho uvepola momaumbo avo otyo evetuala mokalavoso ine okaleya. Etyi ovanthu vamwe ovakalavi ankho vekahi nokuveta Estevau nomamanya alo vemuipaa, Saulu ankho opo ekahi otyo atala.

Mahi okumonesa vala ononkhumbi Ovakristau vo mo Jelusalei kwe ankho katyituuka. Waita komunene-nakwa opo emutume kepunda-umbo lio Damasku oku ankho apondola okukamonesa vali Ovakristau ononkhumbi. Tyina ankho ekahi nokuhika mepunda-umbo, otyimimi tyimwe liwa-liwa atyimuliaimina iya ahamonopo. Eivi ondaka yati: ‘Saulu, omokonda yatyi umonesila ononkhumbi?’ Saulu apulu okuti: ‘Ove-lie?’ Akumbulula okuti: ‘Ame Jesus. Enda ko Damasku iya mokanoñgonoka etyi ove una okulinga.’ Liwa-liwa, Saulu akala omumphoki iya akuatwa menkhanya okutualwa no mepunda-umbo.

Ko Damasku, ankho kuna Omukristau umwe una ekolelo utiwa o Anania. Jesus emupopila memonekelo okuti: ‘Enda keumbo lia Juda, kuata kondyila itiwa Yaviuka, ovola omulume utiwa o Saulu.’ Anania ati: ‘Tatekulu, omulume oo ame ndyimwii nawa! Ukahi nokukuata ovalongwa ovanyingi opo evepake omokaleya!’ Mahi Jesus apopi okuti: ‘Enda-ko. Ame naholovona Saulu, opo akaivise onondaka onongwa kovilongo ovinyingi.’

Ngotyo, Anania avasi Saulu iya emupopila okuti: ‘Saulu, mukuatate, Jesus wanthuma kuove opo ndyikupatule omaiho.’ Liwa-liwa Saulu ahimbika okumonapo. Elilongesa konthele ya Jesus iya akala omulongwa wae. Etyi ambatisalwa akala Omukristau, Saulu ahimbika okuivisa monondyuo mbokufendela, kumwe novalongwa  ovakuavo Ovakristau. Ove upondola okusoka oñgeni ova Judeu vahuvile etyi vamona Saulu ulongesa ovanthu konthele ya Jesus? Avapopi okuti: ‘Omulume oo hayo una waundapesua opo amonese ononkhumbi ovalongwa va Jesus?’

Momanima etatu, Saulu walongesile ovanthu ankho vakala mo Damasku. Ova Judeu ankho veyele Saulu iya avalingi omphango opo vemuipae. Mahi ovakuatate avanoñgonoka okuti vahanda okumuipaa iya avemukuatesako opo akaholame. Avemupake mosesu avemukuatesa kombanda yotyimato konthele onkhuavo yepunda-umbo.

Etyi Saulu ehika ko Jelusalei, ahetekela okuliwaneka kumwe novakuatate ankho veli-mo. Mahi ankho vemutila owoma. Omulongwa umwe omuna-kankhenda utiwa Mbarnabe ekemulekesa ko no apostolu iya evepopila okuti tyili-tyili Saulu walinga omapiluluko. Saulu ahimbika okuivisa onondaka onongwa nombili kumwe newaneno mo Jelusalei. Konyima, aihanwa okuti Paulu.