Sɔɔlo le Wulomunli mɔɔ bɛwole ye wɔ Taasɛse. Ɛnee ɔle Falasiinli mɔɔ ze Dwuuma Mɛla ne kpalɛ na ɛnee ɔkpɔ Kilisienema. Ɔhyele Kilisienema ɔvile bɛ azua nu ɔguale bɛ efiade. Mekɛ mɔɔ menli bie ɛlɛsi Sitiven awolɛ ahu ye bɔbɔ la, ɛnee ɔgyi ɛkɛ ɔlɛnea bɛ.

Noko ɛnee Sɔɔlo ɛngulo kɛ ɔkye Kilisienema mɔɔ bɛwɔ Gyɛlusalɛm la ala. Ɔzɛlɛle adenle ɔvile ɛsɔfo kpanyinli ne ɛkɛ kɛ ɔmaa ɔhɔ Dɛmasekɛse ɔhɔhye Kilisienema mɔɔ bɛwɔ ɛkɛ la noko. Mɔɔ Sɔɔlo ɛlɛbikye sua ne azo la, wienyi bie dale guale ɔ nwo zo na ɔdɔle aze. Ɔdele kɛ ɛnelɛ bie ɛlɛka kɛ: “Sɔɔlo! Duzu ati a ɛlɛyɛ me kpɔdekpɔde zɛhae ɛ?” Sɔɔlo bizale kɛ: “Ɛdawɔ nwane ɔ?” Ɛnelɛ ne buale kɛ: ‘Medame Gyisɛse ɔ. Kɔ Dɛmasekɛse na bɛbaha mɔɔ ɔwɔ kɛ ɛyɛ la bɛahile wɔ.’ Ɛkɛ ne ala Sɔɔlo anye zinle na ɛnee ɔwɔ kɛ bɛsɔ ɔ sa bɛ nee ye kɔ sua ne azo.

Ɛnee Kilisienenli bie mɔɔ di nɔhalɛ mɔɔ bɛfɛlɛ ye Ananayase la wɔ Dɛmasekɛse. Gyisɛse hanle hilele ye wɔ ɛnyelɛzodeɛnwunlɛ nu kɛ: ‘Kɔ awɔdenle ne mɔɔ bɛfɛlɛ ye Fɔɔnwo la azo na kɔkpondɛ nrenyia bie mɔɔ bɛfɛlɛ ye Sɔɔlo la, ɔwɔ Dwudase sua nu ɛkɛ.’ Ananayase hanle kɛ: ‘Awulae, mede nrenyia ɛhye anwo edwɛkɛ dɔɔnwo kɛ ɔlɛkye wɔ ɛdoavolɛma ne yeagua efiade.’ Noko Gyisɛse hanle kɛ: ‘Kɔ! ɔluakɛ mekpa Sɔɔlo kɛ ɔli me nwo daselɛ ɔhile maanle maanle ne mɔ.’

Yemɔti Ananayase nwunle Sɔɔlo na ɔzele ye kɛ: ‘Adiema Sɔɔlo, Gyisɛse ɛzoa me ɛ nwo ɛke amaa wɔanwu debie.’ Ɛkɛ ne ala, Sɔɔlo nwunle debie. Ɔzukoale Gyisɛse anwo debie na ɔrayɛle ye ɛdoavolɛ. Mɔɔ Sɔɔlo yɛle Kilisienenli mɔɔ bɛzɔne ye la, ɔbɔle ɔ bo kɛ ɔ nee ɔ gɔnwo mɔ Kilisienema ka edwɛkɛ ne  wɔ nyianu azua nu. Mɔɔ Dwuuma nwunle kɛ Sɔɔlo ɛlɛkilehile Gyisɛse anwo debie la, ɛnea a adwenle boni a bɛnyianle a? Bɛhanle kɛ: ‘Asoo tɛ nrenyia ne mɔɔ yɛle Gyisɛse ɛdoavolɛma kpɔdekpɔde la ɛne?’

Sɔɔlo vale ɛvolɛ nsa hanle edwɛkɛ ne hilele menli mɔɔ wɔ Dɛmasekɛse la. Dwuuma kpɔle Sɔɔlo na bɛyɛle kɛ bɛku ye. Noko mediema ne mɔ dele edwɛkɛ ne na bɛboale Sɔɔlo bɛmaanle ɔnriandile. Bɛmaanle ɔdɛnlanle kɛndɛne nu na bɛdwulale ye wɔ sua ne bane ne anzi.

Mɔɔ Sɔɔlo hɔdwule Gyɛlusalɛm la, ɛnee ɔkulo kɛ ɔfa ɔ nwo ɔbɔ mediema ne mɔ. Noko ɛnee bɛsulo ye. Ɔti ɛdoavolɛ bie mɔɔ bɛfɛlɛ ye Baanabase la vale Sɔɔlo rale ɛzoanvolɛma ne ɛkɛ na ɔmaanle bɛdele ɔ bo kɛ Sɔɔlo ɛhakyi bɔkɔɔ. Sɔɔlo nee asafo ne mɔɔ wɔ Gyɛlusalɛm la bɔle edwɛkpa ne nolo anyebolo zo. Nzinlii, bɛvɛlɛle ye Pɔɔlo.