Saul wia een reemischa Birja un wia en Tarsus jebuaren. Daut wia een Farisäa, waut goot om daut judische Jesaz omwist, un dee kunn de Christen schlajcht lieden. Dee schlapt de christelje Mana un Frues ut äare Hiesa rut un stopt dee en. Dee wia doa mau rajcht bie, aus eene dolle Grupp Menschen dän Jinja Stefanus met Steena dootkjielden.

Oba Saul wia daut nich jenuach, daut hee bloos de Christen en Jerusalem enstoppen leet. Nu fruach dee dän Huagen Priesta noch, aus hee kunn no de Staut Damaskus gonen toom de Christen doa vefoljen. Aus Saul meist bat de Staut wia, dacht met eenst een kloaret Licht äwa am un hee foll oppe Ieed. Dan säd eene Stemm: “Saul, wuarom vefolchst du mie?” Saul fruach: “Wäa best du?” De Stemm säd: “Ekj sie Jesus. Go no Damaskus, un doa woaren se die sajen, waut du doonen saust.” Saul wia plazlich blint jeworden, un nu musten se dän aune Haunt foten un no de Staut leiden.

En Damaskus wia een trua Christ, waut Hananias heet. Jesus säd to dän en eene Vision: “Go no Judas sien Hus un froag doa no Saul. Daut es opp de Gauss, waut de Jlikje heet.” Hananias säd: “Har, ekj weet krakjt, waut dee deit! Dee stopt diene Jinja en!” Oba Jesus säd: “Go no dän. Ekj hab mie Saul jewält, daut dee väl Velkja de goode Norecht brinjt.”

Dan jinkj Hananias no Saul un säd: “Brooda Saul, Jesus schekjt mie, daut ekj die sull de Uagen opmoaken.” Doamet kunn Saul wada seenen. Hee lieed mea von Jesus, wort een Christ un leet sikj deepen. Dan prädijd hee met de aundre Christen toop en de Judenschoolen. Waut jleefst du,  waut woaren de Juden sikj jedocht haben, aus dee sagen, daut Saul de Menschen von Jesus lieed? Dee säden: “Es daut nich krakjt dee, waut Jesus siene Jinja emma vefoljen deed?”

Dree Joa prädijd Saul de Menschen en Damaskus. De Juden kunnen Saul sea schlajcht lieden un dee wullen dän dootmoaken. Oba de Breeda doa worden daut en un holpen dän, daut dee sikj fuatbrinjen kunn. Dee deeden dän en eenen Korf nenn, un bie een Loch enne Stautsmia leeten see dän rauf.

Aus Saul no Jerusalem jinkj, wull hee met de Breeda doa toop sennen. Oba dee hauden Angst fa dän. Barnabas, een leeftolja Jinja, brocht Saul no de Apostel un läd dee daut ut, daut Saul sikj werkjlich jeendat haud. Dan prädijd Saul flietich met de Vesaumlunk en Jerusalem toop de goode Norecht. Lota wort dee bekaunt aus Paulus.