Saulo are jun achi ajRoma che xalax pa Tarso. Are jun fariseo che qas retaʼm ri kubʼij ri taqanik kech ri judíos xuqujeʼ sibʼalaj itzel keril ri cristianos. Xeresaj bʼi pa kachoch, achijabʼ xuqujeʼ ixoqibʼ, xeʼukʼam bʼi pa cárcel. Xuqujeʼ xtakʼi che rilik are chiʼ jupuq winaq xkikamisaj ri ajtijoxel Esteban che abʼaj.

Are kʼu Saulo xaq xiw ta xraj xeresaj bʼi ri e cristianos pa Jerusalén. Rumal laʼ xubʼij che ri kinimal ri e kojol taq tabʼal toqʼobʼ che ktaq bʼi pa ri tinamit Damasco rech xuqujeʼ kubʼanaʼ kʼax chke ri cristianos chilaʼ. Are chiʼ Saulo kʼo chi naqaj che ri tinamit, jun nimalaj luz xqʼalajin chrij, areʼ xtzaq chuwach ulew. Tekʼuriʼ xuta jun chʼabʼal che kubʼij: «Saulo, ¿jasche kabʼan kʼax chwe?». Saulo xubʼij: «¿At jachinoq?». Ri chʼabʼal xubʼij: «In Jesús. Jat pa Damasco, chilaʼ kbʼix chawe ri rajawaxik kabʼano». Pa ri hora riʼ, Saulo xmoyirik, xa xkʼam bʼi che ri uqʼabʼ kʼa xopan na pa ri tinamit.

Pa Damasco kʼo jun sukʼalaj cristiano ubʼiʼ Ananías. Jesús xubʼij che pa jun achikʼ: «Jat pa ri rachoch Judas, pa ri bʼe ubʼiʼ Sukʼ, chatzukuj ri Saulo». Ananías xubʼij: «Wajaw, nutom kʼi jastaq chrij wajun achi riʼ. Tajin keʼukoj ri ajtijoxelabʼ pa cárcel». Are kʼu Jesús xubʼij: «Jat rukʼ, rumal che xinchaʼ Saulo rech kutzijoj ri utzalaj taq tzij re ri Dios pa kʼi tinamit».

Rumal laʼ Ananías xbʼe rukʼ Saulo tekʼuriʼ xubʼij che: «Saulo, wachalal, Jesús xinutaq loq rech jumul chik katkayik». Chanim, Saulo jumul chik xkayik. Xretaʼmaj jastaq chrij Jesús xuqujeʼ xux rajtijoxel. Xubʼan uqasanjaʼ xuqujeʼ xumaj utzijoxik ri utzij ri Dios pa taq ri e sinagogas kukʼ ri e rachiʼl cristianos. ¿La kachomaj che ri judíos sibʼalaj xkimayo? Kimik kkil Saulo tajin  kukʼut chkiwach chrij Jesús. Ri e judíos xkibʼij: «¿La are ta waʼ ri achi che kubʼan kʼax chke ri rajtijoxelabʼ Jesús?».

Pa oxibʼ junabʼ, Saulo xutzijoj ri utzij Dios chke ri winaq pa Damasco. Ri e judíos sibʼalaj itzel kkilo xuqujeʼ kkaj kkikamisaj. Are kʼu ri e achalal xkita ri kkaj kkibʼan che xkitoʼ rech kanimaj bʼik. Xkiqasaj bʼi pa jun jul chrij ri tapya pa jun chakach.

Are chiʼ Saulo xbʼe pa Jerusalén, xukoj uchuqʼabʼ rech xbʼe che kilik ri e achalal. Are kʼu e areʼ kkixibʼij kibʼ che Saulo. Tekʼuriʼ, jun utzalaj ajtijoxel ubʼiʼ Bernabé xukʼam bʼi Saulo kukʼ ri apóstoles, xukoj uchuqʼabʼ rech kkilo che Saulo qastzij xukʼex ribʼ. Saulo xbʼe pa ri congregación re Jerusalén xumaj utzijoxik rukʼ kikotemal ri utzalaj taq tzij chrij Dios. Qʼaxinaq chi ri tiempo, xkimaj ubʼixik Pablo che.