Sauluqa Tarsu markachö yurikoq romänu nunam karqan. Fariseum kaq, y cösam judïukunapa leyninkunata reqeq. Peru cristiänukunataqa alläpam chikeq. Ollquta warmitapis wayinkunapita qarachëpa jorqëkurmi prësutseq. Juk kutinäqa Jesusman creikoq Estëbanta rumiwan qompar wanutsiyanqantam kushishqa rikararqan.

Peru Sauluqa manam Jerusalenchö cristiänukunata prësutsinqanllawantsu conformakurqan. Tsëmi mandakoq kaq sacerdötita permïsuta mañakurqan Damascu markachöpis tsënö ruranampaq. Y tsë markaman chänampaqna këkaptinmi jiruroqninchö atsikyëkurqan, tsëmi patsaman ishkirirqan. Y kënö neqtam wiyarqan: “Saulu, ¿imanirtaq chikimar qatikachëkämanki?”. Tsënam, “¿pitaq kanki?” nirqan. Y kënö contestaqtam wiyarqan: “Jesusmi kä. Ëwë Damascuta. Tsëchömi imata ruranëkipaq kaqta niyäshunki”. Y tsë höram Sauluqa wisku quedarirqan. Tsëmi tsë markayaq jancharkur apayarqan.

Damascuchöqa Ananïas jutiyoq alli cristiänum täraq. Pëtam juk visionchö Jesus kënö nirqan: “Derëchu nishqan cällichö Jüdaspa wayinman ëwë, y tsëchö Sauluta ashi”. Tsënam Ananïasqa, “Teytë, tsë nunapaqqa imëkata niyaqtam wiyarqö. Pëqa qamman creikoqkunatam prësutsir ushëkan” nirqan. Peru Jesusqa kënömi nirqan: “Ëwë asheq, porqui mëtsika nacionkunachö Diospa alli willakïninkunata willakunampaqmi akrarqö”.

Tsënam Ananïasqa Sauluta asheq ëwarqan, y taririrmi kënö nirqan: “Saulu, wawqi, Jesusmi yapë rikëta puëdinëkipaq qamman kachamashqa”. Y Sauluqa tsë höram rikar qallëkurqan. Y Jesuspita imëkata yachakurirmi creikur qallëkurqan. Tsëmi bautizakurirnin Diosta adorayänan wayikunachö cristiänu mayinkunawan yachatsikur qallëkurqan. Pensari, Jesuspita yachatsikïkaqta rikëkur, ¿ima  niyarqanraq judïu mayinkuna? Pëkunaqa, “¿këqa manaku Jesusman creikoqkunata chikirnin sufritseq nuna?” niyarqanmi.

Sauluqa kima (kimsa) watapam Damascuchö yachatsikurqan. Tsëmi judïukunaqa chikirnin wanutsita munayarqan. Peru tsëta musyarirmi escapar ëwakunampaq cristiänu mayinkuna yanapayarqan. Perqapa juk uchkumpam canastawan bajatsiyarqan.

Jerusalenman chärirqa, tsëchö creikoqkunata watukaqmi Sauluqa ëwarqan. Peru creikoqkunaqa mantsayarqanmi. Tsënam Bernabë jutiyoq cristiänu apostolkuna kaqman pusharqan, y cambiashqana kanqantam pëkunata entienditsirqan. Sauluqa Jerusalenchö creikoqkunawan juntum Diospa alli willakïninkunata gänas gänaslla yachatsikur qallëkurqan. Y tiempuwanqa Pablu nishpanam reqiyarqan.