Saulo runaca Roma llactamanda Tarso pueblopimi nacirirca. Paica judiocunapa Leycunata alipacha yachajushca fariseomi carca. Jesusta catijcunataca nimamanda na ricunayachinllu carca. Paicunapa huasimandami jaricunatapash, huarmicunatapash aisashpa, prezuna huasiman apajurca. Shuj viajeca Sauloca Esteban runaguta gentecuna rumihuan pigashpa huañuchinajujtami ricujurca.

Saulo runaca Jerusalenmanda Jesusta catijcunata prezu apashpapash, Damasco pueblopi Jesusta catijcunatapash llaquichingapaj munashpami curacunata mandajpaman rishpa, chai llactaman cachahuai nishpa parlarca. ‘Ashtahuangarin Damasco llactaman Saulo ña chayagrijujpimi cashna tucurca, cungashcapimi jahua pachamandaca paipa muyundipi michashna punchapamba shitarca’. ‘Shina punchapamba shitajpi Saulo alpaman urmajpimi, Saulo ¿imashpata catiriashpa llaquichihuangui?’ nij uyarirca. Chaimi Sauloca tapurca: “¿Pita capangui?” nishpa. ‘Shina tapujpimi: Jesusmi cani’, ‘cunanga jatarishpa Damasco puebloman rilla. Chaipimi, can imata rurachunbash villanga’ nishpa. ‘Saulo alpamanda jatarishpaca ñana ricui usharcachu. Chaimi, maquimanda aisashpa Damasco puebloman pushanajurca’.

Damasco pueblopica Jesusta ali catij Ananías runagumi causan carca. Paimanmi Jesusca muscuipi shina ricuchishpa nirca: ‘Jatarishpa, Derecho shuti ñanman ri. Chaimandaca Judas runapa huasiman rishpa Saulota mascagri’ nishpa. Shina nijpimi Ananiasca nirca: ‘Jesús, chai runaca canballa causajcunata prezu churashcatami’ uyashcani nishpa. Chaimi Jesusca nirca: ‘Rilla paitaca shuj shuj llactacunapi Diosmanda ali villaicunata villachunmi ña agllarcani’ nishpa.

Chaimi Ananiasca Saulopaman rishpa cashna nirca: ‘Huauqui Saulo, Jesusmi can cutin ricuchun’ ñucata cachamuhuashca nishpa. Chai jipallami Sauloca “cutin ñapash ali ricurca”. Chaimi Sauloca Jesusmanda yachajushpa, paipa catij tucushpa bautizarirca. Shinami tandanajuna huasicunapi paipa cumbacunahuan yachachi callarirca. ¿Nacha judiocunaca manllarishca ricunajushcanga? Cunanga Saulo runa Jesusmanda yachachijujtami gentecunaca ricunajurca. Chaimandami  judiocunaca tapurinajurca: ‘¿Nachu cai runaca, Jesuspa shutipi mañajcunata llaquichin carca?’ nishpa.

Saulo runaca quimsa huatacunatami Damasco pueblopi gentecunaman yachachirca. Judiocunaca paita na ricunayachishpami imashina huañuchinata ricunajurca. Shina huañuchingapaj munanajujta uyashpami, chai pueblomanda llujshichun ‘Saulotaca canastapi churashpa, jatun pirca jahuata uriajuchishpa tuta cacharca’.

Sauloca Jerusalenman rishpa huauquipanicunata ricungapami munarca. Shinapash paicunaca Saulotaca manllanmi carca. Chaimi Jesusta catij Bernabé runaguca Saulota apostolcunapaman pushashpa, pai ña ciertopacha cambiashcata ricuchirca. Shinami Sauloca Jerusalén congregacionhuan Diosmanda ali villaicunata ninanda villachi callarirca. Jipamanga gentecunaca paitaca Pablo nishpami rijsin carca.