Saulu abalwa ku Tarsu, mu dziko ya Roma. Iye akhali Nfarisi wakuti akhadziwa mwadidi mwambo Waciyuda, pontho akhaida Akristu. Iye akhamanga amuna na akazi Acikristu m’manyumba mwawo mbaaikha n’kaidi. Mu ndzidzi wakuti mbumba ikhamenya nyakupfundza Estevau mpaka kufa, Saulu akhayang’ana.

Mbwenye Saulu nee akhafuna basi ene kumanga Akristu a ku Yerusalemu. Iye aphemba nyantsembe wankulu toera antawirise kuenda ku nzinda wa Dhamasku kuti akwanise kuthabusa Akristu kweneko. Pikhali iye cifupi na nzinda, mwakukhonda dembuka, ceza cikulu caoneka mbiciyetima kuna onsene akhali na iye, natenepa iye agwa pantsi. Iye abva fala mbilonga: ‘Saulu, thangwi yanji ukunditcinga?’ Saulu abvundza: ‘Ndimwe ani?’ Ntawiro: ‘Ndine Yezu. Ndoko ku Dhamasku, unadzadziwa pinafunika iwe kucita.’ Buluka penepo, Saulu adzakhala boliboli, pontho akhafunika munthu toera kuntsogolera mpaka ku nzinda.

Ku Dhamasku kukhali na Nkristu wakukhulupirika akhacemerwa Ananiya. Yezu ampanga m’masomphenya: ‘Ndoko ku nyumba ya Yuda ku nseu unathulwa Wakulungama, na saka mamuna anacemerwa Saulu.’ Ananiya alonga: ‘Mbuya, ndisadziwa mbiri yonsene ya mamuna unoyu! Iye aikha anyakupfundza anu n’kaidi!’ Mbwenye Yezu alonga: ‘Ndoko kuna iye. Ine ndansankhula toera kumwaza mphangwa zadidi kuna madzindza mazinji.’

Natenepa, Ananiya agumana Saulu mbampanga: ‘Saulu m’bale wanga, Yezu andituma toera kufungula maso ako.’ Mwakukhonda dembuka, Saulu akwanisa pontho kuona. Iye apfundza thangwi ya Yezu, natenepa adzakhala ntowereri wace. Pakumala kubatizwa ninga Nkristu, Saulu atoma kumwaza mphangwa na Akristu andzace m’masinagoga. Usakwanisa kunyerezera kuti Ayuda apibva tani pidaona iwo Saulu mbakapfundzisa  anthu thangwi ya Yezu? Iwo alonga: ‘Kodi uyu ndi mamuna m’bodzi ene wakuti akhatcinga anyakupfundza a Yezu?’

Mu pyaka pitatu, Saulu amwaza mphangwa kuna anthu akhakhala ku Dhamasku. Ayuda akhaida Saulu, iwo akhacita masasanyiro toera kumupha. Mbwenye abale adziwa pyenepi mbaphedza Saulu toera kuthawa. Iwo amuikha n’citundu mbantcitisa na pa benga ya mpanda wa nzinda.

Pidaenda Saulu ku Yerusalemu, iye ayesera kugumanyikana na abale kweneko. Mbwenye iwo akhan’gopa. Pa ndzidzi unoyu, nyakupfundza m’bodzi akhacemerwa Bhar- nabhe akwata Saulu mbaenda naye kuna apostolo mbaaphedza kubvesesa kuti mwandimomwene Saulu acinja. Saulu atoma kumwaza mphangwa zadidi mwaphinga pabodzi na mpingo ku Yerusalemu. Mukupita kwa ndzidzi, iye adzadziwika na dzina yakuti, Paulu.