Saul ayeke mbeni zo ti Rome so a dü lo na Tarse. Lo yeke lani mbeni Farizien so ahinga Ndia ti aJuif mingi, na lo ye tënë ti aChrétien kete ape. Lo yeke lï na yâ ti da ti aChrétien na ngangu lo yeke gboto akoli na awali na gigi, lo yeke bi ala na da ti kanga. Lo luti même lani lo bâ bango na lê groupe ti azo so ayeke bo lani disciple Étienne juska na kuâ.

Me so Saul agbu aChrétien gï na Jérusalem so alingbi na lo ape. Lo hunda na kota prêtre ti tokua lo na gbata ti Damas, tongaso si lo lingbi ti gi peko ti aChrétien kâ. Tongana Saul aga nduru na gbata ni, mo ye ti bâ, mbeni lumière so aza ngangu angoro lo, lo ngbâ lo tï na sese. Lo mä mbeni go atene na lo, atene: ‘Saul, ngbanga ti nyen mo yeke sara ye ti ngangu na mbi?’ Saul ahunda ndo, atene: ‘Mo yeke zo wa?’ Go ni akiri tënë, atene: ‘Mbi yeke Jésus. Gue na Damas, na a yeke fa na mo ye so a lingbi mo sara.’ Gï na ngoi ni so, Saul abâ ndo encore ape, a gbu gï maboko ti lo la a gue na lo na gbata ni.

Na Damas, a yeke wara mbeni Chrétien so ayeke be-ta-zo so iri ti lo ayeke Ananias. Jésus atene na lo na yâ ti vision, atene: ‘Gue na da ti Judas na lege so a iri ni Lege-so-aba-pepe, gue mo gï Saul.’ Ananias atene: ‘Seigneur, mbi mä gbâ ti tënë na ndö ti koli so! Lo yeke bi ka adisciple ti mo na da ti kanga!’ Me Jésus atene na lo: ‘Gue mo wara lo. Mbi soro Saul ti fa nzoni tënë na azo ti amara kue.’

Tongaso, Ananias ague lo wara Saul na lo tene na lo: ‘Saul, ita ti mbi, Jésus atokua mbi ti zi lê ti mo.’ Na lê ni lê ni, Saul akiri akomanse ti bâ ndo. A fa na lo ye na ndö ti Jésus na lo ga disciple ti lo. So Saul ayeke fadeso mbeni Chrétien awe so, lo komanse ti fa tënë na yâ ti asynagogue, legeoko na amba ti lo aChrétien. Tara ti imaginé tongana nyen la li ti aJuif akpe kue ti bâ Saul  so ayeke fa tënë na azo na ndö ti Jésus! Ala tene: ‘Eskê a yeke koli so lani lo yeke gi adisciple ti Jésus gingo so la ape?’

Teti lango ota, Saul afa tënë na azo so ayeke lango na Damas. A-Juif ake Saul bê oko na ala mä terê ti fâ lo. Me aita amä tënë ni na ala aidé lo ti kpe ti hon. Ala zia lo na yâ ti mbeni sakpa na ala descend lo na li ti gbagba ti gbata ni na sese.

Tongana Saul ague na Jérusalem, lo tara ti wara terê na aita ni kâ. Me mbeto ti lo asara ala. Mbeni nzoni disciple so iri ti lo ayeke Barnabas amû Saul lo gue na lo na abazengele na lo gue na ala ti yeda so Saul achangé awe. Saul akomanse ti fa nzoni tënë mingi legeoko na congrégation na Jérusalem. Na pekoni, a hinga lo na iri ti Paul.