Romanina Saoly. Nateraky ta Tarsosy tany ie. Fariseo ie sady nahay soa ty Lalàna Jiosy. Halany mihintsy ty Kristiana. Tsy nandeferany ndre lahilahy ndre ampela fa nitaritaritiny baka an-tranon-drozy any, bakeo nigadrany. Nitsanga teo soa ie nanenty lafa nitoratorahin’olo rey vato Stefana, ka nimaty.

Nisambosamborini-Saoly iaby ty Kristiana ta Jerosalema tao. Fe mbo tsy niafa-po ie, ka niera tamy mpisorobe hoe hanambotsy ty Kristiana a Damaskosy any koa. Lafa narìny ani-tanà iny ie, le nisy hazavà namirapiratsy tampoky nanodidy azy, ka nitonta tambany teo ie. Nisy feo nireny koa nivola hoe: ‘Saoly, nanino va iha manenjiky ahy io?’ Le hoy Saoly: ‘Ia va iha io?’ Namaly ie hoe: ‘Jesosy avao toy. Mandehana a Damaskosy any, le ho hainao ty raha tokony hataonao.’ Tonga de nijiky Saoly, ka nitanjahy ie zisiky an-tanà ao.

Nisy Kristiana zay ta Damaskosy ao. Ananiasy ty anarany. Niseho taminy tamy fahità Jesosy, le nivola hoe: ‘Mandehana amy tranoni- Jodasy any, amy lala atao hoe Imahitsy iny any, le henteo ao Saoly.’ Hoy Ananiasy: ‘Haiko soa Tompo lahilahy iny! Nigadragadrany iaby mpianatsinao rey.’ Fe hoy Jesosy: ‘Ndany ho aminy any fa fa nifiliko hitory ty vaovao soa amy firenena iaby ie.’

Nandeha amy Saoly any amy zay Ananiasy. Nivola ie hoe: ‘Saoly rahalahiko, nirahini-Jesosy atoy aho soa iha hahita ndraiky.’ Avy le nahita ndraiky Saoly. Nianatsy mikasiky ani-Jesosy ie, ka nanjary mpanori-dia azy. Natao batisa koa ie ka nanjary Kristiana, le nitory tamy synagoga tany niaraky tamy Kristiana namany rey. Nitseriky biby Jiosy rey nahita ani-Saoly nitory mikasiky ani-Jesosy! Nivola  rozy hoe: ‘Tsy tỳ va lahilahy mpanambotsy mpianatsini-Jesosy iny?’

Nitory ta Damaskosy tao avao Saoly tanatini-telo tao. Nihalani-Jiosy rey ie ka nila hevitsy hamonoa azy rozy. Lafa nihaini-finoa raiky aminy rey ty tetikini-Jiosy reo, le nampean-drozy Saoly. Nataon-drozy anaty paniè ie, le najotson-drozy mbamy lafonety raiky tamy lakorobeni-tanà iny eo. Nilay amy zay ie.

Lafa niavy ta Jerosalema any Saoly, le niezaky nila olo finoa raiky aminy. Fe natahotsy azy rozy. Soa avao fa nisy mpianatsy soa fanahy mana anara Barnabasy zay nanday ani-Saoly tamy apostoly rey tany. Nihazavaniny tamin-drozy hoe tena fa niova Saoly. Nazoto nitory ty vaovao soa niaraky tamy fiangona ta Jerosalema tany Saoly. Nanjary Paoly ty nahaiza azy lafa tafara atoy.