O Saulo o se tagatānuu o Roma sa fanau i Taso. O ia o se Faresaio e tomai i le Tulafono a Iutaia, ma na ʻinoʻino o ia i Kerisiano. Na ia toso i fafo tane ma fafine Kerisiano mai i o latou fale, ma tuuina i latou i falepuipui. Na tū foʻi ma matamata a o fetogi Setefano i maa e se vaega o tagata na matuā feita iā te ia, seʻia oo ina oti ai.

Peitaʻi, e leʻi faamalieina Saulo i le faafalepuipuiina na o Kerisiano i Ierusalema. Na ia talosaga atu i le ositaulaga sili ina ia auina atu o ia i le aai o Tamaseko, ina ia mafai ai ona ia puʻeina Kerisiano o loo iai i inā. A o latalata atu Saulo i le aai, na faafuaseʻi ona suluia faataaliʻoliʻo o ia i se malamalama, ma paʻū ai o ia i le eleele. Na ia faalogoina se leo o faapea mai: “Saulo e, aiseā ua e faasauā mai ai iā te aʻu?” Na fai atu Saulo: “O ai ea oe?” Ua faapea mai le leo: ʻO aʻu o Iesu. Inā alu ia i Tamaseko, ma o le a e iloa ai le mea e tatau ona e faia.’ Na faafuaseʻi lava ona tauaso Saulo, ma sa tatau ona taʻitaʻi atu o ia i le aai.

Sa iai i Tamaseko se Kerisiano faamaoni e igoa iā Anania. Na fetalai atu Iesu iā te ia i se vaaiga e faapea: ʻIa e alu i le fale o Iuta i le auala e igoa o Saʻo, ma saʻili ai le tagata e igoa iā Saulo.’ Na tali mai Anania: ʻLe Alii e, ua ou faalogo i tala e faatatau i lenā tagata. Ua ia tuuina ou soo i falepuipui.’ Ae na faapea atu Iesu: ʻIa e alu iā te ia. Ua ou filifilia Saulo e talaʻi atu le tala lelei i nuu e tele.’

O lea ina ua maua atu e Anania o Saulo, ona ia faapea atu lea: ʻLoʻu uso e, Saulo, ua auina mai aʻu e Iesu e faapupula ou mata.’ O le taimi lava lenā na mafai ai ona toe vaai Saulo. Na ia aʻoaʻoina e faatatau iā Iesu ma avea ma ona soo. I le avea ai o Saulo o se Kerisiano ua papatisoina, na amata ona ia talaʻi i sunako faatasi ma ona uso Kerisiano. Seʻi mafaufau i le faateʻia o tagata Iutaia i le vaai o aʻoaʻo atu  Saulo i tagata e faatatau iā Iesu! Na latou faapea ane: ʻPe e lē o le tagata ea lenei na ia puʻeina soo o Iesu?’

E tolu tausaga sa talaʻi ai Saulo i tagata sa nonofo i Tamaseko. Na ʻinoʻino tagata Iutaia iā Saulo ma taupulepule e fasioti o ia. Peitaʻi na iloa e le ʻauuso lenā faufauga, ma fesoasoani iā Saulo ina ia sola ese mai i le aai. Na latou tuuina o ia i se ato ma tuutuu ifo o ia mai i se faamalama i le pā o le aai.

Ina ua alu Saulo i Ierusalema, na taumafai o ia e aufaatasi atu i le ʻauuso i inā, ae na latou fefefe iā te ia. Sa iai se soo agalelei e igoa iā Panapa, na ia avatu Saulo i le ʻauaposetolo, ma faatalitonu i latou ua suia le olaga o Saulo. Na amata ona talaʻi atu ma le maelega e Saulo le tala lelei faatasi ma le faapotopotoga i Ierusalema. Na mulimuli ane suia lona igoa iā Paulo.