Saulus ben de wan borgu fu Rome èn a gebore na ini Tarsus. A ben de wan Fariseiman di ben sabi a Dyu Wet heri bun èn a ben teige den Kresten. A ben e broko go na ini den oso fu Kresten man nanga uma, dan a ben e tyari den go na strafu-oso. A ben e tanapu luku srefi fa wan grupu sma trowe ston na tapu Stefanus teleki a dede.

Ma Saulus no ben sroto soso den Kresten fu Yerusalem. A aksi a granpriester fu seni en go na a foto Damaskus fu go suku den Kresten drape. Di Saulus kon moro krosibei fu a foto, dan wantronso wan brenki faya koti na en lontu èn a fadon na gron. A yere wan sten taki: ’Saulus, fu san ede yu e frufolgu mi?’ Saulus aksi: ’Suma na yu?’ A sten piki: ’Mi na Yesus. Go na Damaskus, dan drape yu o kon sabi moro fara san yu musu du.’ Wantewante Saulus kon breni èn sma ben musu tyari en go na ini a foto.

Na ini Damaskus yu ben abi wan Kresten di ben nen Ananias di ben e dini Gado fayafaya. Na ini wan fisyun, Yesus taigi en: ’Go na a oso fu Yudas na ini a strati di nen Reti. Aksi fu a man Saulus.’ Ananias taki: ’Masra, mi sabi ala sani di a man disi du! A e poti den disipel fu yu na strafu-oso!’ Ma Yesus taki: ’Go na en. Mi teki Saulus fu preiki a bun nyunsu gi furu pipel.’

Ananias go èn a feni Saulus. A taigi en: ’Saulus, mi brada, Yesus seni mi kon fu opo yu ai.’ Wantewante Saulus ben kan si baka. A kon sabi moro fu Yesus èn a tron wan bakaman fu en. Saulus dopu leki wan Kresten èn a bigin preiki na ini den snoga makandra nanga den tra Kresten. Yu kan frustan fa den Dyu skreki di den si Saulus e leri sma fu Yesus. Den  taki: ’A no disi na a srefi man di ben e frufolgu den disipel fu Yesus?’

Dri yari langa Saulus preiki gi sma na ini Damaskus. Den Dyu no ben lobi Saulus èn den ben wani kiri en. Ma di den brada kon sabi disi, den yepi Saulus fu lowe. Den poti en na ini wan baskita, dan den saka en go na gron na wan fensre di ben de na ini a skotu.

Di Saulus go na Yerusalem a pruberi fu moksi nanga den brada drape. Ma den ben frede en. Ne Barnabas, wan disipel di ben abi switifasi, tyari Saulus go na den apostel. A sori den krin taki Saulus ben kenki trutru. Saulus bigin preiki a bun nyunsu fayafaya makandra nanga a gemeente na ini Yerusalem. Bakaten sma kon sabi en leki Paulus.