Saul kai warga negara Roma, i sie nalahirẹ̌ su Tarsus. I sie tau Farisi kụ mapande soal u Hukung tau Yahudi, i sie lai mawěnsing su tau Sahani. I sie měbẹ̌bawa si sire bọu wal᷊eng i sire dingangu nẹ̌taho si sire su penjara. I sie lai timol᷊e němanda su tempong taumata lawọ něngěntungu watu si Stefanus sarang nate.

Katewe, i Saul madiri mạeng kětạeng makasamẹ tau Sahani su Yerusalem. I sie nẹ̌dorong izin su imang mawantugẹ̌ tadeạu měndolohẹ̌ si sie sarang soa Damaskus tadeạu botonge měnamẹ tau Sahani su soa ene. Su tempong i Saul seng maraning soa ene, sěngkělěndịu piạ tualagẹ̌ něliwung si sie, kụ i sie naěngsạ su ěntana. I sie nakaringihẹ̌ piạ tingihẹ̌ nẹ̌bera, ’Saul, kawe i kau mětẹ̌tingkaị si siạ?’ Saul nẹ̌kiwal᷊o, ’I sai i kau?’ Tingihẹ̌ ene simimbahẹ̌, ’Iạ i Yesus. Dakọe sarang Damaskus, kụ i kau sarung makasingkạ apa harusẹ̌ koatengu.’ Saul nawuta, kụ i sie harusẹ̌ tataěng sumuẹ̌ su soa ene.

Su Damaskus, piạ tau Sahani masatia arenge i Ananias. Yesus nẹ̌bisara dingange su sěmbaụ penglihatan, ’Dakọe sarang bal᷊eng i Yudas su Dal᷊eng Matul᷊idẹ̌, kụ pědeạ tau arenge i Saul.’ Ananias nẹ̌bera, ’Tuang, iạ seng nakaringihẹ̌ soal u tau ene! Manga muritu nitaho su penjara karạu tau ene!’ Katewe Yesus simimbahẹ̌, ’Dakọe sarang i sie. Iạ seng němile si sie gunang měhabarẹ̌ habarẹ̌ mapia su lawọ bangsa.’

Ananias nakoạ sarang i Saul kụ nẹ̌bera, ’Saul anạu sěmbaụku, Yesus něngoro si siạ sarang ini gunang měmuka matanu.’ I Saul apidu saụ nakasilo. Bọu ene, i sie něngěndung soal i Yesus kụ nakoạ murite. Su apang bọu nisahani kụ nakoạ tau Sahani, Saul něhabarẹ̌ habarẹ̌ mapia su tampạ pěngangibadang sěngkasio dingangu tau Sahani wal᷊inẹ. Tau Yahudi himěkosẹ̌ su tempong nakasilo si Saul něněntiro taumata wal᷊ine soal i Yesus. I sire nẹ̌bera, ’Kangerẹ bal᷊inẹbe i sie měnẹ̌namẹ manga muriti Yesus?’

 Karěngụe tělu taung i Saul mělẹ̌habarẹ̌ habarẹ̌ mapia su Damaskus. Tau Yahudi nawěnsing si Saul kụ někoạ rencana měmate si sie. Katewe, manga hapịe nakasingkạ soal u rencana ene kụ nẹ̌tul᷊ung si Saul siměbang bọu soa ene. I sire nẹ̌taho si sie su ral᷊ungu karanjang gěguwạ kụ nělintụ si sie bọu sěmbaụ lohang su těndạ u soa ene.

Su tempong nẹ̌bal᷊ị su Yerusalem, i sie mapulu mẹ̌komol᷊ẹ̌ dingangu anạu sěmbaụ sene. Katewe, i sire matakụ si siẹ. Bọu ene, sěngkatau muritẹ̌ mapia arenge i Barnabas, nẹ̌bawa si Saul sarang anung manga rasulẹ̌. I sie nẹ̌tul᷊ung si sire nangimang i Saul seng nẹ̌bal᷊ui. Saul něnětạ něhabarẹ̌ habarẹ̌ mapia dingangu masěmangatẹ̌ sěngkasio dingangu sidang jamaatẹ̌ su Yerusalem. Samurine, i sie nisěbạ Paulus.