Naterake ta Tarsisy agne ty Saoly sady nanagne zo Romana. Fariseo nahay Lalàna Jiosy reke, sady nalaigne o Kristianao. Nitaritarike o Kristianao isan-tragno reke sady nampigadra iareo. Teo ka reke tamy ty fotoagne nitoram-bato i Stefana.

Faie tsy nahafa-po aze ty fitsepahagne ty Kristiana ta Jerosalema ao. Nangatake tamy i mpisorom-beỳ reke mba halefa a Damaskosy agne, hipaliae’e ze Kristiana agne. Naho fa narine ho avy agne reke, le nisy hazavagne namilepiletse ty nagnodidigne aze, hafara’e reke nitonta an-taneo. Naharey feo nitoka reke tie: ‘O Saoly, nagnino i rehe magnenjeke ahio?’ Le hoe ty Saoly: ‘Ia i reheo?’ Namale i feoy tie: ‘I Jesosy. Mandehana a Damaskosy agne rehe, fa agne ty hianara’o ty raha tsy maintsy hatao’o.’ Nanjare goa ty Saoly, le tinarike ty nahavia’e a Damaskosy ao.

Nisy Kristiana tsy mivalike atao tihoe Ananiasy ty ta Damaskosy ao. Nirehake tama’e tamy ty fahitagne ty Jesosy tie: ‘Mandehana an-tragno i Jodasy agne, amy ty lalagne atao tihoe Imahitsy, fa hotrea’o ao ty Saoly.’ Hoe ty Ananiasy: ‘O Tompo, fantako soa ty laza ze ndaty zay! Fa ginadra’e iaby o mpiana’o reo.’ Faie hoe ty Jesosy tama’e: ‘Mandehana, fa ie ty finiliko hitory i talily soay amy ty firenena maro.’

Nitrea i Ananiasy ty Saoly, le hoe reke: ‘O rahalahy Saoly, nalefa i Jesosy ama’o atoy raho hampa- hatrea i maso’oy.’ Le nahatrea amy izay ty Saoly. Nianatse ty miomba i Jesosy reke, le nanjare mpano- njohy ty lia’e. Naho fa vita badisa reke, le nitory tamy i synagogay ao niharo tamy ty Kristiana hafa. Nigaga o Jiosio naho fa nahatrea  i Saoly nampianatse o vahoakeo ty miomba i Jesosy. Hoe iareo: ‘Tsy i ndaty mpagnenjeke i mpiana i Jesosy rey vao itiagneo?’

Nitory ta Damaskosy tao avao ty Saoly tagnate ty telo taogne. Maro ty Jiosy nalaigne aze sady te hamono aze. Faie nisy rahalahy nahafantatse izay, le nampilay aze. Natao iareo tagnate harogne reke, le nazotso iareo tambaly i manda i tanàgney ao.

Naho fa nandeha ta Jerosalema agne reke, le nipalia o rahalahy ao reo. Faie natahotse aze iareo. Nandese ty mpianatse atao tihoe Barnabasy mbamo o apostoly reo mbeo ty Saoly sady nihazavae’e tamy iareo tie fa niova reke. Nazoto nitory i talily soay niharo tamy ty fiangonagne ta Jerosalema ao ty Saoly. Novagne ho Paoly ty agnara’e tafara tatoy.