Saolo aki ose Rɔmɔ lakotɔ la Taraso. Nde aki Ofarisɛ wakeyaka ɛlɛmbɛ w’ase Juda dimɛna ndo nde akahetshaka Akristo. Nde akatondjaka apami la wamato w’Akristo oma lo mvudu yawɔ ndo akawadjaka lo lokanu. Nde aki laawɔ eenda woho wakokaka olui w’anto ombeki Stɛfano ave la nkɛlɛ tshɛ polo lo nde mvɔ.

Koko Saolo kokomɛ tsho lo minda Akristo wa la Jɛrusalɛma. Nde akalɔmbɛ ɔlɔmbɛdi a laadiko dia mbotoma otsha l’osomba wa Damasɛkɛ dia nde tonda Akristo wa lɛkɔ. Lam’aki Saolo suke l’osomba akɔ, osase wakɔhɛtɛ la shashimoya lo dihole diakinde, ko nde akakɔ la nkɛtɛ. Nde akoke dui dimɔtshi diawotɛ ɔnɛ: ‘Saolo, lande na kampɛnyahɛnyayɛ?’ Saolo akambola ate: ‘Wɛ na?’ Ko nde akakadimola ate: ‘Dimi Yeso. Tshɔka la Damasɛkɛ, ko wɛ ayoteya kɛnɛ kahombayɛ nsala.’ Lo wonya akɔ waamɛ, Saolo akayala tshungu ndo akahombe paka onto mbokimɛ lo lonya dia nde tokoma l’osomba.

La Damasɛkɛ mbaki Okristo ɔmɔtshi wa kɔlamelo wakawelɛka Ananiya. Yeso akawotɛ lo ɛnɛlɔ ate: ‘Tshɔka lo luudu la Judasɛ lo shinga yelɛwɔ ɔnɛ Nsembɔ ndo toyange Saolo.’ Ananiya akate ate: ‘Nkumadiɔndjɔ, dimi mbeyaka akambo tshɛ wendana la pami kakɔ! Nde ekɔ lo mbidja ambeki ayɛ lo lokanu!’ Ko Yeso akawotɛ ate: ‘Tshɔka le nde. Dimi lambɔsɔna Saolo dia nde nsambisha lokumu l’ɔlɔlɔ lo wedja efula.’

Ko Ananiya akɛnana la Saolo ndo akawotɛ ate: ‘Saolo ɔnalengo, Yeso ambontoma dia ndjokodihola washo.’ Mbala kakɔ ɔtɔi, Saolo akatatɛ mɛna nto. Nde akeke akambo wendana la Yeso ndo akakome ombeki ande. Etena kakandabatizama oko Okristo, Saolo akatatɛ nsambisha lo toshinangɔnga kaamɛ l’asekande Akristo. Onde wɛ koka nkanyiya  woho wakayaoke ase Juda lo mɛna Saolo asambisha akambo wendana la Yeso? Vɔ wakate vate: ‘Onde ɔnɛ aha pami kakɔ kaamɛ kakasalɛka ambeki wa Yeso kɔlɔ?’

L’edja k’ɛnɔnyi esato, Saolo akasambishaka anto wakadjasɛka la Damasɛkɛ. Ase Juda wakahetshaka Saolo ndo wakayange dia mbodiaka. Koko anangɛso wakeye sheke shɔ ndo wakookimanyiya dia nde mpandɔ. Vɔ wakawodje lo kisaka ndo wakooholoya lo wosho waki l’ehele k’osomba.

Lam’akatshu Saolo la Jɛrusalɛma, nde akayange dia monga kaamɛ l’anango waki lɛkɔ. Koko vɔ wakawokaka wɔma. Ko ombeki ɔmɔtshi w’otema ɔlɔlɔ wakawelɛka Barnabasɛ akatɔlɛ Saolo le apɔstɔlɔ ndo akawaetawoya dia Saolo ambotshikitana mɛtɛ. Saolo akatatɛ nsambisha lokumu l’ɔlɔlɔ l’ohetoheto tshɛ kaamɛ l’etshumanelo ka la Jɛrusalɛma. L’ɔkɔngɔ diko, nde akayeyamaka oko Pɔɔlɔ.