Saulo wenga zika ya Roma ndipu wanguwiya ku Tariso. Iyu wenga Mufarisi yo waziŵanga marangu nga Ayuda ndipu watinkhanga Akhristu. Saulo wamanganga Akhristu kunyumba zawu ndi kuchiŵaŵika mujeri. Nyengu yinyaki po chigulu cha ŵanthu wo angukwiya chaponyanga mya Stefano mpaka kufwa, Saulo wenga penipo ndipu wawoneriyanga.

Saulo wangukhorwa cha kumanga Akhristu a ku Yerusalemu pe. Mwaviyo, wangupempha wasembi mura kuti wamuzomerezi kuluta ku Damasiko kuti wakamangi Akhristu wo ajanga kweniko. Saulo we pafupi kufika mutawuni yo, mwamabuchibuchi ukweru ukulu ungumuŵaliya ndipu wanguwa pasi. Iyu wanguvwa mazu ngakuti: “Saulo, utinditombozgiyanji?” Iyu wangufumba kuti: “Ndimwi ayani?” Yesu wangumuka kuti: ‘Ndini Yesu. Luta ku Damasiko ndipu wamukuvwa vo utenere kuchita.’ Saulo wanguleka kuwona kwa kanyengu ndipu wakhumbikanga kulongozgeka ndi munthu kuluta ku tawuni yeniyi.

Ku Damasiko, kwenga Mkhristu wakugomezeka zina laki Hananiya. Yesu wangumukambiya muchiwona kuti: ‘Luta ku nyumba yaku Yuda mu mumsewu wo udanika kuti Wakunyoloka, ndipu ukapenji ko kwe Saulo.’ Hananiya wangumuka kuti: ‘Ambuya ndiziŵa vosi vakukwaskana ndi munthu mwenuyu. Iyu waŵika akusambira ŵinu mujeri.’ Kweni Yesu wangukamba kuti: ‘Luta kwaku iyu. Ndasankha Saulo kuti wakapharazgi uthenga wamampha ku mitundu yinandi.’

Mwaviyo, Hananiya wangukumana ndi Saulo ndipu wangumukambiya kuti: ‘Saulo mubali wangu, Yesu wandituma kuti ndizikujuli masu.’ Nyengu yeniyo, Saulo wangwamba kuwona. Iyu wangusambira zaku Yesu ndipu wanguja wakusambira waki. Wati wabatizika kuja Mkhristu, wangwamba kupharazga mumasinagogi pamoza ndi Akhristu anyaki. Kumbi uŵanaŵana kuti Ayuda anguvwa wuli ŵati awona kuti Saulo wasambiza ŵanthu zaku Yesu? Yiwu  anguti: ‘Kumbi ndi munthu mwenuyu cha yo wamanganga akusambira aku Yesu?’

Kwa vyaka vitatu, Saulo wangupharazgiya ŵanthu wo ajanga ku Damasiko. Ayuda angumutinkha ukongwa Saulo ndipu akhumbanga kumubaya. Kweni abali anguziŵa vo ŵanthu akhumbanga kuchita ndipu angumuwovya kuti wathaŵi. Yiwu angumuŵika mubasiketi ndipu angumutuzgiya pa zenji lo lenga pa chimati cha mpanda.

Saulo wati waluta ku Yerusalemu, wanguyesesa kuti wachitengi vinthu limoza ndi abali kweni yiwu amuwopanga. Pavuli paki, wakusambira munyaki yo wenga walisungu zina laki Baranaba, wanguza ndi Saulo kwa akutumika ndipu wanguŵasimikizgiya kuti wakusintha. Saulo wangwamba kupharazga mwaphamphu limoza ndi mpingu wa ku Yerusalemu. Pavuli paki, zina laki lingusintha kuja Paulo.