Савл Тарс деп черге төрүттүнген рим хамааты чораан. Ол фарисей болгаш, иудей хоойлуну дыка эки билир. Ол христианнарга хөңнү чок болгаш, эр-херээжен дивейн, оларны кара-бажыңнап турган. Стефан деп христиан кижини кылыктанган улус даштар-биле эттеп-соп турда, ол анаа көрүп турган.

Савл христианнарны Иерусалимге истеп сүрүп турган. Ынчалза-даа ооң хыы ханмайн, Дамаскыда христианнар-биле демисежир чөпшээрелди дээди бараалгакчыдан ап алган. Савл ол хоорайже чоокшулап кел чыткаш, хенертен чырык көрүп кааш, черже кээп дүшкеш: «Савл, мени чүге истеп сүрүп тур сен?» — деп, үн дыңнаан. «Кым сен?» — деп айтырган. «Мен Иисус-тур мен. Дамаскыже баргаш, улаштыр чүнү канчаарыңны билип алыр сен» — деп, ол үн харыылаан. Ол-ла дораан Савл согурара берген. Улус ону хоорайже чедирип каан.

Дамаскыга Анания дээр христиан кижи чурттап чораан. Иисус аңаа көстүүшкүнге мынча дээн: «Дорт деп кудумчуже баргаш, Иуданың бажыңындан Савл деп аттыг кижини тып ал». Анания удурланган: «Дээрги, ол кижиниң дугайында хөйнү дыңнаан мен. Ол сээң өөреникчилериңни кара-бажыңнап турар болгай!» Ынчалза-даа Иисус: «Олче бар. Мен Савлды буянныг медээни хөй чонга суртаалдаар кылдыр шилип ап тур мен» — дээн.

Анания Савлга: «Дуңмам Савл, сээң карактарың катап көре бээр кылдыр, Иисус мени чоргузупту» — дээн. Савл катап көрүп эгелээн. Ол Иисустуң дугайында билип алгаш, сугга суктуруп, христиан апарган. Ол өскелер-биле кады синагогаларга суртаалдап эгелээн. Иисустуң дугайында  улусту Савлдың өөредип турарын көргеш, еврейлер кайы хире кайгаан деп бодаар сен?! Олар: «Иисустуң өөреникчилерин бо кижи истеп сүрүп турган эвес ийик бе?» — деп айтыржып турган.

Савл Дамаскыга үш чыл суртаалдаан. Еврейлер ону өлүрер деп баарга, акылар Савлды дестирипкен. Олар ону аргаан хааржакка олурткаш, хоорайның ханазындан бадырыпкан.

Савл Иерусалимге келгеш, өске христианнар-биле ужуражыксаарга-даа, олар коргар болган. Ынчан Варнава дээр бир эки кижи Савлды шынап-ла өскерли берген деп шынзыткан. Савл ынчан Иерусалимде чыыш-биле кады буянныг медээни идепкейлиг суртаалдап эгелээн. Соонда улус ону Павел деп таныыр апарган.