Te Saulo jaʼ jtul romano-winik te ayin ta lum Tarso. Jaʼ jtul fariseo te ya snaʼ ta lek te leyetik yuʼun te judioetike sok la skontrain ta jkʼaxel te jchʼuunjeletike. La stsaktiklan lokʼel ta sna te winiketik sok te antsetik soknix la yotseslan ta karsel. Te Saulo tekʼel ta yilel te kʼalal jtsojb ants winiketik te ay slab yoʼtanik yakik ta schʼojel ta ton te jnopojel Esteban.

Pero te Saulo ma tikʼuk la yaʼiy-a te jaʼnax ya yotses ta karsel te jchʼuunjeletik ta Jerusalene. Jaʼ yuʼun la skʼanbey te mukʼul sacerdote te yakuk xtikunot bael ta Damasco swenta ya snuts-euk te jchʼuunjeletik tey-ae. Te kʼalal nopol ya xkʼotix ta Damasco-a te Sauloe, joytayot yuʼun xojobil kʼajkʼ, jich metsel kʼoel ta lum. La yaʼiy te ay machʼa kʼopoje: “Saulo, ¿bin yuʼun te ya anutsone?”. Te Saulo la sjojkʼoybey: “¿Machʼaat-a?”. Jich sutbot: “Joʼon te Jesusone. Baan ta Damasco tey ya awichʼ albeyel-a te bin ya skʼan ya apase”. Ta yorail-abi, tupʼ sit te Saulo sok la snitik bael ta skʼab kʼalal ta Damasco.

Ta Damasco ay jtul winik te jun yoʼtan yakʼoj sba ta stojol Dios te Ananías sbiile. Te Jesús ay bin la yalbey ta najalsitil: “Baan ta sna te Judas, ta kaye Derecha sbiil sok lea te Saulo”. Te Ananías la sut: “Kajwal, bayal bintik kaʼiyoj ta stojol te winik-abi. Yak ta yotsesel ta karsel te jnopojeletik awuʼune”. Pero te Jesús la sutbey: “Baan ta stojol, melel jtsaojix te Saulo yuʼun ya schol te lek yachʼil kʼop yuʼun Dios ta stojol bayal nasionetik”.

Jich te Ananías bajtʼ te banti ay te Saulo sok la yalbey: “Saulo, kermano, te Jesús la stikunon tal swenta ya awil kʼinal yan buelta”. Ta oranax, te Saulo la yil kʼinal yan buelta. La snopbey skʼoplal te Jesús sok och ta jnopojel. La yichʼ jaʼ sok kaj schol skʼop Dios sok te sjoʼtak ta jchʼuunjel ta sinagogaetik. Kʼalal te judioetik la  yilik te Saulo te yakix ta snojptesel te ants winiketik ta swenta te Jesuse, ¿binwan-utʼil la yaʼiy sbaik? Jich la sjojkʼoybey sbaik: “¿Mabal jaʼuknix te winik te ya snuts te jnopojeletik yuʼun te Jesuse?”.

Te Saulo oxeb jaʼbil la scholbey skʼop Dios te ants winiketik ta Damasco. Te judioetik la skontrainik sok la schajpanbeyik skʼoplal ta milel. Pero te hermanoetik la yaʼiyik stojol te bin la yichʼ chapele, jaʼ yuʼun la skoltayik ta anel. La sjijpanik koel ta moch ta pat tsʼajkʼ yuʼun te lume.

Te kʼalal bajtʼ ta Jerusalén te Sauloe, la spas tulan ta yulaʼtayel te hermanoetik. Pero te hermanoetike xiʼojik te Sauloe. Jich yuʼun, jtul jnopojel te kʼax lek yoʼtan te Bernabé sbiil la yikʼ bael te Saulo ta stojol te jpuk-kʼopetik sok la yaltiklanbey te yuʼun-nix jelonemix-a te Sauloe. Te Saulo jun-nax kaj ta aʼtel sok te kongregasion ta Jerusalén sok kaj ta scholel te lek yachʼil kʼop yuʼun Dios sok sbujtsʼ yoʼtan. Ta patil la yichʼ naʼbeyel sba jich bitʼil Pablo.