Li Sauloe te vokʼ ta Tarso pe tey naki ta Roma. Jaʼ jun jfariseoal vinik ti xchanoj lek li mantaletik yuʼun judioetike xchiʼuk solel spʼajoj li yajtsʼaklomtak Kristoe. Yuʼun bat xjochan lokʼel ta snaik li viniketik xchiʼuk antsetik yoʼ stikʼanan ta chukele. Pe maʼuk noʼox, yuʼun jun veltae te noʼox skʼeloj kom ti kʼu yelan laj yichʼ milel ta ton li Esteban ti jaʼ jun yajchankʼop Jesuse.

Pe li Sauloe muʼyuk bu bal noʼox chaʼi ti tstikʼanan ta chukel li yajtsʼaklomtak Kristo ta Jerusalene. Jaʼ yuʼun laj yalbe li mero bankilal pale ti akʼo xtakat batel ta Damasko sventa stikʼanan ta chukel li yan yajtsʼaklomtak Kristo teye. Kʼalal jutuk xa ox skʼan xkʼot ta Damasko li Sauloe, ta anil noʼox joyobtabil kʼot ta xojobal lus ti lik tal ta vinajele, vaʼun li Sauloe lom ta lum xchiʼuk laj yaʼi jun yechʼomal eil ti xi chale: «Saulo, ¿kʼu yuʼun ti yakal chanutsune?». Li Sauloe xi la sjakʼe: «¿Buchʼuot?». Vaʼun xi takʼav li yechʼomal eile: «Voʼon Jesusun. Batan ta Damasko jaʼ tey cha-albat li kʼusi skʼan xapase». Kʼalal jech albat li Sauloe maʼsat kom, vaʼun nitbil bat kʼalal to ta Damasko.

Oy jun yajchankʼop Kristo ta Damasko ti Ananias sbie, tukʼ yakʼoj sba ta stojolal Dios, xi albat yuʼun Jesus li Ananias kʼalal oy kʼusi akʼbat yile: «Vaʼlan, batan li ta kaye ti bu Tukʼ chalbeik sbie, vaʼun bat saʼo jun vinik ta sna Judas ti Saulo sbie». Xi la stakʼ li Ananiase: «Kajval, ep kaʼioj chalbeik skʼoplal li vinik taje, yuʼun yakal stikʼ ta chukel skotol li buchʼutik chalik abie». Pe xi takʼbat yuʼun li Jesuse: «Batan yuʼun laj xa jtʼuj sventa spukbe skʼoplal li lekil aʼyejetik yuʼun Dios ta epal lumetike».

Jaʼ yuʼun li Ananiase bat skʼel li Sauloe, xi kʼot yalbee: «Ermano Saulo, li Kajvaltik Jesuse la stakun tal sventa xjam asat yan velta». Vaʼun ta ora noʼox jam sat li Sauloe laje lik xchan li mantaletik ta sventa li Jesuse xchiʼuk pas ta jchankʼop ek, ta tsʼakale laj yichʼ voʼ xchiʼuk lik xcholbe skʼoplal Jesus ta snail tsobobbailetik xchiʼuk li yan yajtsʼaklomtak Kristoe. ¿Mi xnop  avuʼun ti kʼu yelan chʼayal to kom yoʼontonik li judioetike? Jaʼ yuʼun xi to la sjakʼbe sbaike: «¿Mi mu jaʼuk li vinik ti chilbajin toʼox li yajchankʼoptak Jesuse?».

Oxib jabil la xcholbe mantal krixchanoetik ta Damasko li Sauloe. Pe li judioetike solel spʼajojik tajek li Sauloe xchiʼuk laj xa ox xchap skʼopik ti tsmilike. Kʼalal laj yaʼiik li ermanoetik taje la skoltaik yoʼ xjatav batel li Sauloe. Vaʼun la stʼuyanik yalel ta jun moch ti bu jomol li ta muroe.

Kʼalal bat ta Jerusalen li Sauloe bat skʼel li ermanoetike. Pe li ermanoetik taje solel chiʼik tajek ta stojolal. Pe oy jun yajchankʼop Jesus ti toj lek yoʼonton ti jaʼ sbi Bernabee, laj yikʼ batel Saulo ta stojolal jtakboletik xchiʼuk laj yalanbe ti jelem xa stalelal li Sauloe. Vaʼun li Sauloe te kom li ta tsobobbail ta Jerusalene xchiʼuk ta sjunul yoʼonton la xcholbe skʼoplal li lekil aʼyej ta sventa Diose. Pe ta mas tsʼakale laj yichʼ jelbel li sbie: laj yakʼbeik sbiin Pablo.