Saoly io Romanin̈y teraka ta Tarsosy. Fariseo izy, ten̈a nahay Lalàn̈a Jiosy, fa izy tsy tia Kristianin̈y. Naboakany baka tantran̈ondro iro Kristianin̈y aby io, ke nigadrainy, na lelahy na man̈angy. Nibanjainy fo iro olo nitorabato ndreky namono Stefana.

Tsy Kristianin̈y ta Jerosalema fo nataony zen̈y, fa izy mbala mila hanambotro Kristianin̈y ta Damaskosy koa. Izy nangataka lalan̈a tamy pisoron̈obe handeha tan̈y. Saoly koa fa narikitry tanàna io, tio fo izy nahita raha nazava be, ke izy lavo tamy tany. Naharen̈y feo izy baka tio: ‘Saoly, nan̈ino ma anao man̈enjiky zaho?’ Ho Saoly: ‘Azovy ma anao?’ Feo io nivolan̈a: ‘Zaho Jesosy. Mandihana a Damaskosy anao, fa an̈y han̈ambaran̈a raha mila hataonao.’ Nivadiky gila Saoly, ke nila olo nitantan̈a izy.

Nisy Kristianin̈y araiky ta Damaskosy, Ananiasy an̈arany. Jesosy nivolan̈a taminany baka tamy fahitan̈a: ‘Anao mandihana antran̈ony Jodasy, amy lalan̈a Imahitsy, ke tadiava ao Saoly.’ Ho Ananiasy: ‘Tompoko anao, haiko tsarabe kony raha momba olo io e! Maro pianatranao nigadrainy!’ Ho Jesosy: ‘Mandihana fo anao. Zaho efa nifidy Saoly hitory vaovao tsara amy firenena maro.’

Ke Ananiasy amy zay nandeha nizaha Saoly. Nivolan̈iny taminany: ‘Rahalahy Saoly, Jesosy nan̈iraka zaho hitaha masonao.’ Nahita Saoly! Izy nianatra raha momba Jesosy, ke nanjary Kristianin̈y. Koa fa vita batisa izy, nitory tamy synagoga niaraka tamy Kristianin̈y hafa. Misora taitry mare iro Jiosy aby io nahita Saoly nampianatra raha momba Jesosy! Ho iro: ‘Tsy io lelahy nanambotro pianatra Jesosy aby in̈y?’

 Nitory ta Damaskosy tao fo Saoly tan̈atiny telo taon̈o. Nanjary tsy tiandro Jiosy aby io izy, ke nitadiavandro hevitry hamonoan̈a izy. Haindro rahalahy aby io tetikindro zen̈y, ke nampilifasindro Saoly. Nataondro tan̈atiny antomby izy, ke najotsondro baka tamy lafenaitara tamy ribany tanàna io.

Nandeha ta Jerosalema Saoly, baka io izy nitady piaramanompo tan̈y, fa iro navozo izy. Nakiry izy nisy pianatra tsara fan̈ahy zay, Barnabasy an̈arany, nitondra izy taminy apostoly tan̈y, nivolan̈a tamindro fa Saoly efa niova marin̈y. Saoly nazoto nitory vaovao tsara ta Jerosalema niaraka tamy fiangonan̈a tao. Nanjary Paoly an̈aranany tafara tatỳ.