Saulo jwaliji m’Loma jwakupagwila ku Taliso. Jwalakwe ŵaliji Mfalisi juŵamanyililaga mnope Cilamusi ca Ayuda, soni ŵaŵengaga Aklistu. Jwalakwe ŵakamulaga acalume ni acakongwe ŵaciklistu msimangwawo ni kwaponya m’nyumba ja ukayidi. Ŵandu ŵakutumbila paŵam’wulagaga Sitefano mwakumponya maganga, Saulo jwapali ni jwalolelaga kuwulajidwa kwakwe.

Nambo Saulo nganajikutila ni kwataŵa Aklistu ŵa ku Yelusalemupe. Jwalakwe jwam’ŵendile jwamkulungwa jwa ŵambopesi kuti amtumisye kumsinda wa Damasiko kukwasosasosa Aklistu. Saulo paŵaŵandicile kumsindawo, mwacisisimucisya, malo gaŵalijigo gaŵasile mnope mwamti jwalakwe jwagwile pasi. Ni jwapikene maloŵe gakuti, ‘Saulo, ligongo cici mkundagasya une?’ Ni jwalakwe jwawusisye kuti, ‘Ana wawojo ŵani?’ Ni jwapikene kwanga kuti, ‘Une ndili Yesu. Mjawule ku Damasiko, ni cimkamanyilile yamkusosekwa kutenda.’ Ndaŵi jijojo, Saulo jwaŵele jwamtatale, mwamti pasosekwaga mundu jwine kuti amlongolele mumsinda mwakumkamula pamkono.

Ku Damasiko, kwaliji Mklistu jwakupilicika lina lyakwe Hananiya. Kupitila m’mesomkulola, Yesu ŵamsalile jwalakwe kuti, ‘Mjawule kunyumba ja Yudasi, mpitile litala lyakolanjidwa kuti Litala Lyagoloka, mkawusye ya Saulo.’ Nambo Hananiya jwatite, ‘Ambuje ngumanyilila ya mundu jwelejo. Jwalakwe akwaponya m’nyumba ja ukayidi ŵakulijiganya ŵawo.’ Nambo Yesu ŵatite, ‘Mjawule kwa jwalakwe. Namsagwile Saulo kuti alalicile utenga wambone ku mitundu jejinji.’

M’yoyo Hananiya ŵamsimene Saulo ni ŵamsalile kuti, ‘Mlongo mjangu Saulo, Yesu andumisye kwa mmwejo kuti nam’wugule meso.’ Ndaŵi jijojo, Saulo jwatanditesoni kulola. Jwalakwe jwalijiganyisye yakwamba Yesu ni jwaŵele jwakumkuya jwakwe. Mpela Mklistu jwam’batiswe, Saulo jwatandite kulalicila m’nyumba  syakupopelela yalumo ni Aklistu acimjakwe. Ana mkuganisya kuti Ayuda ŵapikene uli ali am’weni Saulo ali mkwalalicila ŵandu yakwamba Yesu? Ayudawo ŵatite, ‘Ana aju ngaŵa mundu juŵasosagasosaga ŵakulijiganya ŵa Yesu jula?’

Kwa yaka yitatu, Saulo jwaŵele ali mkwalalicila ŵandu ŵaŵatamaga ku Damasiko. Ayuda ŵam’ŵengaga Saulo mwamti ŵalinganye yakuti am’wulaje. Nambo abale ali ayimanyi yaŵalinganyisye Ayudawo, ŵamkamucisye kuti atile. Jemanjajo ŵam’ŵisile m’citundu ni kumkoposya mumsindamo kupitila palibowo lya lutenje lwa msinda.

Saulo ali apite ku Yelusalemu, ŵasakaga kuti atameje yalumo ni abale. Nambo abalewo ŵamjogopaga. Kaneko jwakulijiganya jwine jwacanasa, jwakolanjidwa Banaba, ŵamjigele Saulo ni kwawula najo kwa ŵandumetume. Jwalakwe jwasimicisye jemanjajo kuti Saulo acenjile yisyesyene. Saulo jwatandite kulalicila utenga wambone mwamtawu yalumo ni mpingo wa ku Yelusalemu. Kaneko jwalakwe jwatandite kumanyika kuti Paulo.