Saulo gócbu toib buñ romano né golbu toib lagary ni góc laa Tarso. Gócbu toib feriseo né gonbu guirá ni ná ley xtuny buñ judíos né láaca bianladxbu cristianos. Saulo bioʼbu lidx xpiin Jesús né goleʼ lafuersbu buñguieeu né buñgonaʼ lidx né bisalbu biinreʼ lachquiip. Dada gosagaʼbu bibiʼbu ximod tipnés buñ mal bigasguieeyibu Esteban ni góc toibtica xpiin Jesús.

Per Saulo diti goyoʼbu conforma cualóbu cristianos lainy gudx Jerusalén. Por ngú gonabbu permís ló sumo sacerdote par goyeebu gudx Damasco par ñonybu scúca. Órni ma yaaca nadxin Saulo gudxcú, goyoʼ toib guii ni bicaptzaʼdit ronoʼbu né biabbu layoo. Ór cú bicadiagbu toib rudx: «Saulo, ¿xigony cacalólo naʼ?». Saulo gonabdiitz: «¿Chú looy?». Rudxcu cuapy: «Jesús naʼ. Goyee Damasco, né cú sanlo xi non gonylo». Ór cú bical ló Saulo, ma loña buñ bidxinbu Damasco.

Gudx Damasco goyoʼ toib buñ ni buny ni ná Jehová né góc láabu Ananías. Ló toib visión Jesús gochbu Ananías: «Goyee lidx Judas, rabésbu ló toib cay ni laa Recta, né cú biyopy Saulo». Ananías cuapy: «Señor, ma bicadiaga xidal cós ni bunybu. Láabu cagoʼbu xpiinlo lachquiip». Per Jesús goniʼ: «Goyee ronoʼbu, portín ma golúya Saulo par guiniʼbu diitz sacró xtuny Dios lainy xidal gudxrop».

Ór cú Ananías goyeebu ronoʼ Saulo né goniʼbu: «Saulo, buch, Jesús bixel naʼ par guisiala looy né labúu guibiʼlo». Órcuca Saulo ma labúu bibiʼ stoib, bisuidybu de Jesús né gosaló bunybu ni ná Jesús. Goyonisbu né gosaló goniʼbu diitz sacró xtuny Dios né stipnés xpiin Jesús. ¿Xpensarylo ximod gosac buñ judíos órni gon láani? Nigoreʼ  buñ judíos ma bibiʼyibu Saulo casuidybu buñ de Jesús. Judíos gonabdiitz: «¿Diti buñguieeu reʼ ni bianladx guirá xpiin Jesús la?».

Por tzón íz gosaa Saulo lainy gudx Damasco goniʼbu xtiitz Dios. Buñ judíos bianladx láabu né biyopyibu mod nagaityibu Saulo. Per tipnés herman gon ni ná buñ ñony, por ngú gocnéyibu Saulo. Goloʼyibu Saulo lainy toib dzoim né bilitbu Saulo laidy muro xtuny gudxcú.

Órni goyee Saulo Jerusalén, nábu ñeebu ronoʼ tipnés herman. Per guirá herman bidzuibyibu nabiʼyibu Saulo. Ór cú toib herman ni góc laa Bernabé goynébu Saulo ronoʼ apóstoles par nabiʼyibu que nigolú ma bitzaʼ Saulo mod góc. Saulo bidop né congregación ni goyoʼ Jerusalén né gosaló goniʼbu xtiitz sacró Dios né gan. Después buñ ma bimbu láabu xomod Pablo.