Cesarea markanjja romanonakan ejercitopan serviri mä oficialaw jakäna. Janis judiökchïnjja, judionakajj wal respetapjjäna. Wali khuyaptʼayasiri wajjtʼasiri jaqënwa, pobrenakarojj wal yanaptʼäna. Corneliojj Jehová Diosar creyïnwa, orasipunirïnwa. Mä urojj mä angelaw jupar uñstäna, akham sasa: ‘Oracionanakamjja Diosajj istʼiwa. Jope markar mä qhawqha jaqenak khitam, ukhamat Pedror jawsanipjjañapataki’ sasa. Corneliojj kimsaniruw Jope markar khitäna, uka markajj 50 kilometronak aynach toqer sarañankänwa.

Ukañkamajja Pedrojj mä visionwa Jope markan uñjäna. Judionakajj jan manqʼapjjañapäkäna uka animalanakwa uñjäna. Ukhamaruw mä aru akham sir istʼäna: ‘Uka animalanak manqʼam’ sasa. Pedrojj janiw manqʼañ munkänti, ‘qʼañut uñjat animalanakjja janipuniw manqʼerïkti’ sasaw säna. Uka arojj saskakïnwa: ‘Diosajj qʼomachjje uka animalanakarojj jan qʼañuw samti’ sasa. Ukatjja sarakïnwa: ‘Kimsaniw punkuman saytʼatäsipki, jupanakar arkam’ sasa. Pedrojj punkur sarasaw uka jaqenakarojj ‘kunarus jutapjjta’ sasin jisktʼäna. Jupanakasti sapjjarakïnwa: ‘Romanonakan ejercitopan serviri Cornelio sat mä oficialaw khitanipjjetu. Jupaw Cesarea markar jawsayasktam’ sasa.  Pedrow uka arumajj uka jaqenakar alojtʼäna. Qhepür alwajj jupanakampiw Cesarear saräna. Jope markankir yaqhep jilatanakas jupamp chikaw sarapjjarakïna.

Corneliojj Pedror purinir uñjasajj qonqortʼasïnwa. Ukampis Pedrojj akham sänwa: ‘Saytʼasim, nayajj jumjam jaqekirakïtwa. Janis judionakajja jan judiöpki uka jaqenakan utapar mantapkchejja, nayarojj Diosaw khitanitu. Mirä amp suma, kunatsa jawsayista uk sitaya’ sasa.

Corneliojj Pedror akham sänwa: ‘Pusi urunak nayraw nayajj Diosar orasiskayäta, ukhajj mä angelaw “Pedror jawsayam” sasin situ, ukatwa jawsaysma. Mirä amp suma, Jehová Diosan arunakap yatichapjjeta’ sasa. Pedrosti sänwa: ‘Cheqpachapuniw amuyta, Diosajj janiw khitirus yaqhachkiti. Jan ukasti khititejj jupar adorañ munki ukarojj katoqakiwa’ sasa. Pedrojj Jesusjjatwa yatichäna. Corneliompi utapankirinakampejj espíritu santo katoqapjjäna, taqeniw bautisasipjjarakïna.